'ബോളിവുഡ് കാത്തിരുന്ന താരോദയം'; ചടുല നൃത്തവുമായി രവീണ ടണ്ടന്റെ മകള്‍ റാഷ തഡാനി, ആവേശത്തില്‍ ആരാധകര്‍

ബോളിവുഡില്‍ വലിയ ചര്‍ച്ചയാവുകയാണ് നടി രവീണ ടണ്ടന്റെ മകള്‍ റാഷ തഡാനിയുടെ സിനിമാ അരങ്ങേറ്റം. ആസാദ് എന്ന ചിത്രത്തിലൂടെയാണ് റാഷ അഭിനയത്തിലേക്ക് ചുവടുവെക്കുന്നത്. ഇപ്പോള്‍ ഹൃദയം കവരുന്നത് ചിത്രത്തിലെ റാഷയുടെ ഒരു ഡാന്‍സ് നമ്പറാണ്.

ഉയി അമ്മ എന്നു തുടങ്ങുന്ന ഗാനമാണ് പുറത്തുവന്നത്. ഗംഭീര നൃത്ത ചുവടുകളുമായാണ് റാഷ ഗാനരംഗത്തില്‍ പ്രത്യക്ഷപ്പെടുന്നത് കബടാതെ താരപുത്രിയുടെ എക്‌സ്പ്രഷനും സ്‌ക്രീന്‍പ്രസന്‍സുമെല്ലാം ആരാധകരെ അമ്പരപ്പിക്കുകയാണ്. നിരവധി പേരാണ് റാഷയെ പ്രശംസിച്ചുകൊണ്ട് എത്തുന്നത്.

പുത്തന്‍ തലമുറയിലെ രവീണ ടണ്ടന്‍ എന്നായിരുന്നു ഒരാളുടെ കമന്റ്. ബോളിവുഡ് കാത്തിരുന്ന താരം എന്നാണ് മറ്റൊരാള്‍ കുറിച്ചത്. അജയ് ദേവ്ഗണിന്റെ സഹോദരി പുത്രനായ ആമന്‍ ദേവ്ഗണ്‍ ആണ് ആസാദില്‍ നായകനാവുന്നത്. അജയ് ദേവ്ഗണും ചിത്രത്തില്‍ അഭിനയിക്കുന്നുണ്ട്. ജനുവരി 17ന് ചിത്രം തിയറ്ററിലെത്തും.