'നായികയുടെ അരക്കെട്ടില്‍ നുള്ളുന്ന നായകന്‍'; കാന്താര വിമര്‍ശനങ്ങള്‍ക്ക് മറുപടി നല്‍കി ഋഷഭ് ഷെട്ടി

ബോക്‌സ് ഓഫീസില്‍ ചരിത്രം കുറിക്കുകയാണ് ഋഷഭ് ഷെട്ടി നായകനായ കാന്താര ചാപ്റ്റര്‍ 1. ആദ്യ ഭാഗത്തിലൂടെ ഋഷഭിനെ തേടി ദേശീയ പുരസ്‌കാരം വരെ എത്തിയിരുന്നു. രണ്ടാം ഭാഗത്തിലും തന്റെ പ്രകടനത്തിലൂടേയും സംവിധാനത്തിലൂടേയും കയ്യടി നേടുകയാണ് ഋഷഭ് ഷെട്ടി. അതേസമയം കാന്താര ഋഷഭിന് കയ്യടി മാത്രമല്ല, വിമര്‍ശനങ്ങളും നേടിക്കൊടുത്തിട്ടുണ്ട്.

2022 ല്‍ പുറത്തിറങ്ങിയ കാന്താരയില്‍ ഋഷഭ് അവതരിപ്പിക്കുന്ന നായക കഥാപാത്രം നായികയുടെ സമ്മതമില്ലാതെ വയറില്‍ നുള്ളുന്ന രംഗം വലിയ വിമര്‍ശനം നേരിട്ടിരുന്നു. കാന്താര ചാപ്റ്റര്‍ 1ന്റെ പ്രൊമോഷന്റെ ഭാഗമായി നല്‍കിയ അഭിമുഖത്തില്‍ ആ രംഗത്തിനുള്ള വിമര്‍ശനങ്ങള്‍ക്ക് ഋഷഭ് മറുപടി നല്‍കുകയാണ്. കാന്താരയിലെ ശിവ നായകന്‍ മാത്രമല്ല, വില്ലന്‍ കൂടിയാണെന്നാണ് ഋഷഭ് പറയുന്നത്.

'ആദ്യഭാഗത്തില്‍ ശിവയുടെ യാത്രയായിരുന്നു കാണിച്ചത്. അയാള്‍ നായകന്‍ മാത്രമല്ല വില്ലന്‍ കൂടിയായിരുന്നു. നായകനായ അയാള്‍ എന്തോ തെറ്റ് ചെയ്യുകയാണെന്ന് ആളുകള്‍ തെറ്റിദ്ധരിച്ചു. അയാള്‍ എന്തുചെയ്യരുതെന്ന് കാണിക്കുകയായിരുന്നു ഞാന്‍. എന്താണോ ചെയ്യേണ്ടത് അതിന്റെ വിപരീതമായിരുന്നു അയാള്‍ ചെയ്യുന്നത്. ഒരുപാട് നെഗറ്റിവിറ്റി അയാള്‍ നേരിട്ടു, ഒടുവില്‍ കഥാപാത്രം തിരിച്ചറിവിലേക്ക് എത്തുന്നു. മാറ്റങ്ങളിലേക്ക് നയിക്കുന്ന സാഹചര്യങ്ങളും കഥ കാണിച്ചുതരുന്നു' എന്നാണ് ഋഷഭ് പറയുന്നത്.

അതേസമയം ആദ്യ ഭാഗത്തില്‍ സ്ത്രീകഥാപാത്രങ്ങള്‍ക്ക് പ്രധാന്യം കുറവാണെന്ന വിമര്‍ശനത്തേയും ഋഷഭ് തള്ളിക്കളയുന്നുണ്ട്. ചിത്രത്തിലെ അമ്മയുടെ കഥാപാത്രം വളരെ പ്രധാനപ്പെട്ടതും ശക്തവുമാണെന്നാണ് അദ്ദേഹം ചൂണ്ടിക്കാണിക്കുന്നുണ്ട്. കഥയ്ക്ക് അനുയോജ്യമായ രീതിയിലാണ് കഥാപാത്രങ്ങളെ സൃഷ്ടിച്ചതെന്നും ഋഷഭ് പറയുന്നുണ്ട്.

സിനിമ എപ്പോഴും സമൂഹത്തെ പ്രതിഫലിപ്പിക്കുന്നു. സമൂഹത്തില്‍ കാണുന്നതിനെ പുനരാവിഷ്‌കരിക്കാന്‍ സ്വാതന്ത്ര്യമുണ്ട്. ചിലപ്പോള്‍ അത് പോസിറ്റീവ് ആയിരിക്കും, മറ്റുചിലപ്പോള്‍ നെഗറ്റീവും. നമ്മള്‍ എല്ലാം ആവിഷ്‌കരിക്കുന്നു, എന്നാലത് എങ്ങനെ സ്വീകരിക്കണം എന്നത് പ്രേക്ഷകരുടെ തീരുമാനമാണെന്നും ഋഷഭ് ഷെട്ടി പറയുന്നു. സിനിമകള്‍ക്ക് പ്രധാനപ്പെട്ട ആശയങ്ങളും വിവരങ്ങളും നല്‍കാന്‍ കഴിയും. ആളുകള്‍ നല്ലത് സ്വീകരിക്കുകയും നെഗറ്റീവായ കാര്യങ്ങള്‍ കണ്ടശേഷം ഉപേക്ഷിക്കുകയും ചെയ്യുകയാണെന്നും താരം പറഞ്ഞു.

അതേസമയം ബോക്‌സ് ഓഫീസില്‍ വന്‍ കുതിപ്പാണ് കാന്താര ചാപ്റ്റര്‍ 1 നടത്തുന്നത്. ഇതിനോടകം തന്നെ സിനിമ 500 കോടി പിന്നിട്ടിട്ടുണ്ട്. ഋഷഭ് ഷെട്ടി പ്രധാന വേഷത്തിലെത്തുന്ന ചിത്രത്തിന്റെ സംവിധാനവും അദ്ദേഹം തന്നെയാണ്. രുക്മിണി വസന്ത്, ജയറാം തുടങ്ങിയവരും പ്രധാന വേഷങ്ങളിലെത്തുന്നു.