'ഡാൻസിന്റെ സ്പീഡ് ഒന്ന് കുറയ്ക്കുമോ? എനിക്ക് പിടിച്ച് നിൽക്കാൻ പറ്റുന്നില്ല'; തെന്നിന്ത്യൻ താരങ്ങളോട് ഷാരുഖ് ഖാൻ

ബോളിവുഡിൽ മാത്രമല്ല ലോകമെമ്പാടും ആരാധകരുള്ള നടൻമാരിലൊരാളാണ് ഷാരുഖ് ഖാൻ. അദ്ദേഹത്തിന്റെ ഡാൻസിനും ആരാധകരേറെയാണ്. ഇപ്പോഴിതാ ദുബായിലെ ​ഗ്ലോബൽ വില്ലേജിൽ വച്ച് തെന്നിന്ത്യൻ താരങ്ങളേക്കുറിച്ച് ഷാരുഖ് പറഞ്ഞ ഒരു കാര്യമാണ് സോഷ്യൽ മീഡിയ കീഴടക്കി കൊണ്ടിരിക്കുന്നത്. റിപ്പബ്ലിക് ദിനത്തിൽ ഗ്ലോബൽ വില്ലേജിലെത്തിയതായിരുന്നു കിങ് ഖാൻ. ഏകദേശം എൺപതിനായിരത്തോളം ആരാധകരാണ് ഷാരൂഖിനെ കാണാനായി ചടങ്ങിലെത്തിയത്.

"കേരളം, കർണാടക, ആന്ധ്ര, തെലങ്കാന, തമിഴ്നാട് എന്നിവിടങ്ങളിൽ നിന്നുള്ള എന്റെ എല്ലാ ആരാധകരോടുമായി ഒന്നു പറയുകയാണ്. എനിക്കവിടെയെല്ലാം ഒരുപാട് സുഹൃത്തുക്കളുണ്ട്. അല്ലു അർജുൻ, പ്രഭാസ്, റാം ചരൺ, യഷ്, മഹേഷ് ബാബു, വിജയ്, രജനികാന്ത് സാർ, കമൽ ഹാസൻ സാർ... ഇവരൊക്കെ എന്റെ നല്ല സുഹൃത്തുക്കളാണ്. ഇവരോടെല്ലാം എനിക്കൊരു അപേക്ഷയുണ്ട്. ദയ്വ് ചെയ്ത് ഇത്രയും വേ​ഗത്തിൽ ഡാൻസ് ചെയ്യരുത്. നിങ്ങളോട് പിടിച്ചു നിൽക്കാൻ എനിക്ക് ബുദ്ധിമുട്ടാണ്,".- ഷാരുഖ്‌ പറഞ്ഞു.

നിമിഷ നേരം കൊണ്ട് തന്നെ ഷാരുഖിന്റെ ഈ വിഡിയോ വൈറലാവുകയും ചെയ്തു. തന്റെ പുതിയ ചിത്രം കിങിനെക്കുറിച്ചും ഷാരുഖ് വേദിയിൽ സംസാരിച്ചു. "എന്റെ സംവിധായകൻ സിദ്ധാർത്ഥ് ആനന്ദ് വളരെ കർശനക്കാരനാണ്. പത്താൻ ഒരുക്കിയതും അദ്ദേഹമാണ്. അതുകൊണ്ട് തന്നെ അദ്ദേഹം വളരെ സ്ട്രിക്ട് ആണ്.

മോഹൻലാലിന്റെ നായികയായി മാളവിക മോഹനൻ; 'ഹൃദയപൂർവം' അപ്‍ഡേറ്റ്

ഈ സിനിമയെക്കുറിച്ചുള്ള ഒരു വിവരങ്ങളും പറയരുതെന്ന് അദ്ദേഹം നിർദേശിച്ചിട്ടുണ്ട്. അതുകൊണ്ട് എനിക്ക് കൂടുതൽ ഒന്നും പറയാൻ നിർവാഹമില്ല. എങ്കിലും എല്ലാവരെയും രസിപ്പിക്കുന്ന ചിത്രമായിരിക്കും ഇതെന്ന് ഞാൻ ഉറപ്പ് നൽകുന്നു".- ഷാരുഖ് ഖാൻ കൂട്ടിച്ചേർത്തു.