കോവിഡ്, കൈയ്യിൽ ഒന്നര മാസം പ്രായമുള്ള കുഞ്ഞ്, അമ്മയും അർജുനും പോസിറ്റീവ്; വിഡിയോ പങ്കുവച്ച് സൗഭാഗ്യ 

കോവിഡ് ബാധിതയായിരുന്ന ദിവസങ്ങൾ എങ്ങനെ തരണം ചെയ്തെന്ന അനുഭവം പങ്കുവച്ച് നടിയും നർത്തകിയുമായ സൗഭാ​ഗ്യ വെങ്കിടേഷ്. ഒന്നര മാസം പ്രായമുള്ള കുഞ്ഞുമായാണ് സൗഭാ​ഗ്യ കോവിഡിനെ മറികടന്നത്. പോസിറ്റീവ് ആണെന്ന് സ്ഥിരീകരിച്ചതിന് ശേഷമുള്ള നാലാം ദിവസത്തെ വിശേഷങ്ങളാണ് സൗഭാ​ഗ്യ യൂട്യൂബിൽ പങ്കുവച്ച വിഡിയോയിൽ പറയുന്നത്. 

കടുത്ത പനിയുൾപ്പെടെയുള്ള ലക്ഷണങ്ങളാണ് തനിക്കുണ്ടായിരുന്നതെന്നും. കുഞ്ഞിനെ മുലപ്പാൽ നൽകാൻ മാത്രമാണ് കൈയിലെടുത്തിരുന്നതെന്നും സൗഭാ​ഗ്യ പറയുന്നു. കഴിച്ചിരുന്ന മരുന്നുകളെക്കുറിച്ചും താരം പങ്കുവച്ചിട്ടുണ്ട്. എന്നാൽ ഡോക്ടറെ കണ്ടശേഷം മാത്രമേ ഇത്തരം കാര്യങ്ങളിൽ തീരുമാനം എടുക്കാവൂ എന്ന് സൗഭാ​ഗ്യ പറയുന്നു. 

ആദ്യ രണ്ട് ദിവസങ്ങളിൽ നല്ല പനിയും ക്ഷീണവുമായിരുന്നെന്നും കുഞ്ഞുള്ള മറ്റാർക്കെങ്കിലും ഈ വിഡിയോ പ്രയോജനപ്പെടും എന്ന് കരുതിയാണ് ഷൂട്ട് ചെയ്യുന്നതെന്നുമെല്ലാം തുടക്കതിതിൽ തന്നെ സൗഭാ​ഗ്യ പറയുന്നുണ്ട്. ഓരോ ദിവസവും ചെയ്യുന്ന കാര്യങ്ങൾ വിശദീകരിച്ചശേഷം നാലാം ദിവസം ഉച്ചയോടടുത്തപ്പോഴാണ് സൗഭാ​ഗ്യയുടെ ഭർത്താവും നടനുമായ അർജുനും അമ്മ നടിയും നർത്തകിയുമായ താര കല്യാണിനും ലക്ഷണങ്ങൾ കാണിച്ചുതുടങ്ങിയത്. ഇതോടെ അൽപം ആരോ​ഗ്യം വീണ്ടെടുത്ത സൗഭാ​ഗ്യ കുട്ടിയുടെ ബാക്കി കാര്യങ്ങൾ നോക്കുകയായിരുന്നു.