'അവരെന്റെ ഹണിമൂൺ കൂടി പ്ലാൻ ചെയ്തിരുന്നെങ്കിൽ'; വിവാഹ വാർത്തകളോട് പ്രതികരിച്ച് തൃഷ

വിവാഹവുമായി ബന്ധപ്പെട്ട് കഴിഞ്ഞ ദിവസം സോഷ്യൽ മീഡിയയിൽ പ്രചരിച്ച വ്യാജ വാർത്തകളിൽ പ്രതികരണവുമായി നടി തൃഷ കൃഷ്ണൻ. പരിഹാസ രൂപേണയാണ് തൃഷയുടെ മറുപടി. തന്‍റെ ജീവിതം പ്ലാന്‍ ചെയ്യുന്നവര്‍ ഹണിമൂണ്‍ കൂടി ഷെഡ്യൂള്‍ ചെയ്യണമെന്നും തൃഷ കുറിച്ചു. ഇന്‍സ്റ്റഗ്രാം സ്റ്റോറിയിലൂടെയാണ് തൃഷയുടെ പ്രതികരണം. ‘ആളുകള്‍ എന്‍റെ ജീവിതം എനിക്കു വേണ്ടി പ്ലാന്‍ ചെയ്യുന്നത് എനിക്ക് വളരെ ഇഷ്ടമാണ്.

അവര്‍ ഹണിമൂണ്‍ കൂടി ഷെഡ്യൂള്‍ ചെയ്യുന്നതിന് കാത്തിരിക്കുകയാണ് ഞാൻ’ എന്നാണ് തൃഷ ഇന്‍സ്റ്റഗ്രാം സ്റ്റോറിയിൽ കുറിച്ചത്. ചണ്ഡീ​ഗഡിൽ നിന്നുള്ള വ്യവസായിയുമായി തൃഷ വിവാഹം ചെയ്യാന്‍ ഒരുങ്ങുന്നു എന്നായിരുന്നു കഴിഞ്ഞ ദിവസം പ്രചരിച്ച വാര്‍ത്തകള്‍.

ഇരു കുടുംബങ്ങളും വര്‍ഷങ്ങളായി പരിചയമുള്ളവരാണെന്നും വിവാഹത്തിന് തൃഷയുടെ മാതാപിതാക്കള്‍ സമ്മതിച്ചു എന്നും റിപ്പോര്‍ട്ടുണ്ടായിരുന്നു. നേരത്തെയും വിവാഹം സംബന്ധിച്ച വാര്‍ത്തകളില്‍ തൃഷ പ്രതികരിച്ചിരുന്നു. ശരിയായ ഒരാളെ കണ്ടെത്തിയാല്‍ വിവാഹം കഴിക്കുമെന്നും എന്നാല്‍ ശരിയായ സമയം വന്നിട്ടില്ലെന്നുമായിരുന്നു തൃഷ പറഞ്ഞത്.

നേരത്തെ, വ്യവസായിയും നിര്‍മാതാവുമായ വരുണ്‍ മണിയനുമായി തൃഷയുടെ വിവാഹം ഉറപ്പിച്ചിരുന്നു. 2015 ലായിരുന്നു വിവാഹനിശ്ചയം. പിന്നീട് ബന്ധം ഉപേക്ഷിച്ചു. വിവാഹശേഷം തൃഷ അഭിനയം തുടരുന്നതുമായി ബന്ധപ്പെട്ട അഭിപ്രായവ്യത്യാസമാണ് ബന്ധം ഉപേക്ഷിക്കുന്നതിലേക്ക് നയിച്ചതെന്ന് റിപ്പോര്‍ട്ടുകള്‍ ഉണ്ടായിരുന്നു.