'നസ്‌ലിന്റെ മുഖം സ്ക്രീനിൽ വന്ന ഉടനെ പെൺകുട്ടികൾ വിസിലടിക്കാൻ തുടങ്ങി'; പുകഴ്ത്തി ലക്കി ഭാസ്കർ സംവിധായകൻ

പ്രേമലു എന്ന ചിത്രത്തിലൂടെ തെലുങ്ക് സിനിമാ പ്രേക്ഷകർക്കിടയിലും ഒട്ടേറെ ആരാധകരുള്ള നടനാണ് നസ്‌‌ലിൻ. ലോകയിലൂടെ വീണ്ടും തെലുങ്ക് പ്രേക്ഷകരുടെ ഹൃദയം കവർന്നിരിക്കുകയാണ് നടനിപ്പോൾ. ചിത്രത്തിന്റെ സക്സസ് മീറ്റിനിടെ ലക്കി ഭാസ്കർ സിനിമയുടെ സംവിധായകൻ വെങ്കി അട്‌ലൂരി നസ്‌ലിനെക്കുറിച്ച് പറഞ്ഞ വാക്കുകൾ ഏറ്റെടുത്തിരിക്കുകയാണ് സോഷ്യൽ മീഡിയ.

നസ്‌ലിന്റെ തെലുങ്ക് ആരാധകരെക്കുറിച്ചാണ് അദ്ദേഹം വാചാലനായത്. നസ്‌ലിനെ സ്ക്രീനിൽ കണ്ട ഉടൻ തിയറ്ററിൽ ആഘോഷമായിരുന്നുവെന്ന് വെങ്കി പറഞ്ഞു. "മലയാളത്തിലെ എല്ലാ അഭിനേതാക്കളും ഗംഭീരമായി അഭിനയിക്കുന്നവരാണ്.

അതൊരു സത്യമാണ്. ചന്തുവും അരുണും എന്നെ ശരിക്കും ചിരിപ്പിച്ചു. പിന്നെ നസ്‌ലിൻ... ഞാൻ പറയുന്നത് സത്യമാണ്... നിങ്ങളുടെ മുഖം സ്ക്രീനിൽ വന്ന ഉടനെ... നിങ്ങൾ അഭിനയിക്കാൻ പോലും തുടങ്ങിയിട്ടില്ല... അപ്പോഴേക്കും പെൺകുട്ടികൾ വിസിലടിക്കാൻ തുടങ്ങി. ആളുകൾക്ക് അത്രയും ഭ്രാന്തമായ ആരാധനയുണ്ട്". - വെങ്കി പറഞ്ഞു.

വെങ്കിയുടെ വാക്കുകൾ വലിയ കയ്യടികളോടെയാണ് കാണികൾ സ്വീകരിച്ചത്. വെങ്കി സംസാരിച്ചത് തെലുങ്കിലായിരുന്നതു കൊണ്ട് പറഞ്ഞതെന്താണെന്ന് നസ്‌ലിന് കൃത്യമായി മനസിലായിരുന്നില്ല. വെങ്കി അറ്റ്ലൂരി പറഞ്ഞ കാര്യങ്ങൾ ദുൽഖർ സൽമാനാണ് നസ്‌ലിന് പരിഭാഷപ്പെടുത്തിക്കൊടുത്തത്.

കാര്യം മനസിലായതോടെ അത്ഭുതത്തോടെയും സന്തോഷത്തോടെയും ആ അഭിനന്ദനം നസ്‌ലിൻ ഏറ്റുവാങ്ങുന്നത് വിഡിയോയിൽ കാണാം. ദുൽഖർ സൽമാൻ നിർമിച്ച് ഡൊമിനിക് അരുൺ സംവിധാനം ചെയ്ത ‘ലോക’ ഭാഷയുടെ അതിർത്തികൾ ഭേദിച്ച് നിറഞ്ഞ സദസുകളിൽ പ്രദർശനം തുടരുകയാണ്.

ലോകോത്തര നിലവാരമുള്ള സിനിമ 30 കോടിയിലാണ് നിർമിച്ചത്. ആ തുകയിൽ ഇത്തരമൊരു സിനിമ സാങ്കേതികത്തികവോടെ നിർമിക്കുക എന്നത് ചിന്തിക്കാൻ പോലും കഴിയാത്ത കാര്യമാണെന്നാണ് മലയാളത്തിന് പുറമെയുള്ള ഇൻഡസ്ട്രികളിലെ പ്രമുഖർ പറയുന്നത്. റിലീസ് ചെയ്ത് ദിവസങ്ങൾക്കുള്ളിൽ 100 കോടി ക്ലബിൽ ഇടം നേടിയ ചിത്രം പുതിയ ഉയരങ്ങളിലേക്ക് കുതിക്കുകയാണ്.