ബിഎംഡബ്ല്യു സൈക്കിളിൽ പാഞ്ഞ് മോഹൻലാൽ; 'അനന്തന്റെ മോൻ ഇപ്പോഴും നാടുവാഴി തന്നെ'; വിഡിയോ വൈറൽ 

വെള്ള ടീഷർട്ടും ഷോർട്സുമണിഞ്ഞ് ബിഎംഡബ്ല്യു സൈക്കിളിൽ പായുന്ന നടൻ മോഹൻലാലിന്റെ വി‍ഡിയോ ഏറ്റെടുത്ത് ആരാധകർ. പ്രഭാത വ്യായാമത്തിനിടെ ന​ഗരത്തിലൂടെ സൈക്കിളിൽ പോകുന്ന താരത്തെയാണ് വിഡിയോയിൽ കാണാൻ കഴിയുക. താരത്തിന്റെ അടുത്ത സുഹൃത്തും വ്യവസായിയുമായ സമീർ ഹംസയാണ് സൈക്കിളിങ്ങ് വിഡിയോ പങ്കുവച്ചിരിക്കുന്നത്.

'അനന്തൻറെ മോൻ ഇപ്പോഴും നാടുവാഴി തന്നെ' എന്ന അടിക്കുറിപ്പോടെയാണ് വിഡിയോ പങ്കുവച്ചത്. ഫിറ്റ്നസിൽ ഏറെ ശ്രദ്ധിക്കുന്ന മോഹൻലാലിന്റെ വർക്കൗട്ട് വീഡിയോകൾ ഇടയ്ക്കിടെ വൈറലാകാറുണ്ടെങ്കിലും സൈക്ലിങ് വിഡിയോകൾ അപൂർവ്വമായാണ് ആരാധകരെ തേടിയെത്തുന്നത്. കാഫ് മസിലുകൾക്ക് വേണ്ടി വ്യായാമം ചെയ്യുന്ന മോഹൻലാലിന്റെ വിഡിയോ അടുത്തിടെ വൈറലായിരുന്നു. 

മോഹൻലാൽ ചിത്രം  മരക്കാർ അറബിക്കടലിന്റെ സിംഹം ഏറെ വിവാദങ്ങൾക്ക് ശേഷം തിയറ്റർ റിലീസ് പ്രഖ്യാപിച്ചതിന്റെ ആവേശത്തിലാണ് ആരാധകർ. ചിത്രം ഡിസംബർ 2ന് തിയറ്ററുകളിലെത്തും.