'സൂപ്പർ മാൻ മീറ്റിങ് വിളിച്ചു കൂട്ടി ആളെ കൊന്നിട്ടില്ല, എന്താ അണ്ണാ ഇതൊക്കെ'; വിജയ് ചിത്രം ജന നായകന്റെ പോസ്റ്ററിന് ട്രോൾ

തമിഴ് സിനിമാ പ്രേക്ഷകർ ഏറെ ആവേശത്തോടെ കാത്തിരിക്കുന്ന വിജയ് ചിത്രമാണ് ജന നായകൻ. എച്ച് വിനോദ് സംവിധാനം ചെയ്യുന്ന ചിത്രം ഒരു പൊളിറ്റിക്കൽ ത്രില്ലറായാണ് എത്തുന്നത്. ഇപ്പോഴിതാ ചിത്രത്തിന്റെ റിലീസ് തീയതി പുറത്തുവിട്ടിരിക്കുകയാണ് അണിയറപ്രവർത്തകർ. പൊങ്കൽ റിലീസ് ആയി ജനുവരി ഒൻപതിന് ചിത്രം തിയറ്ററുകളിലെത്തും. അതേസമയം സിനിമയുടെ റിലീസ് പോസ്റ്ററിന് നേരെ വിമർശനവും ‌‌ട്രോളും ഉയരുന്നുണ്ട്.

പോസ്റ്റർ എഐയിൽ ചെയ്തത് ആണെന്നാണ് പ്രധാന വിമർശനം. 'കോളിവുഡിന്റെ സൂപ്പർ മാൻ', 'സൂപ്പർ മാൻ ആളുകളെ രക്ഷിച്ചു, വിജയ് ആളുകളെ കൊന്നു', 'വെറിത്തനം ആയിട്ടുണ്ട്', 'തമിഴ്നാട് മാത്രം ആണോ രക്ഷിക്കുന്നത് അല്ലെങ്കിൽ ഇന്ത്യ മൊത്തം ആണോ', 'സൂപ്പർ മാൻ മീറ്റിങ് വിളിച്ചു കൂട്ടി ആളെ കൊന്നിട്ടില്ല', 'ഇതിപ്പോ റിട്ടയർമെന്റ് കോമഡി പീസ് ആകുമെന്ന് തോന്നുന്നുണ്ടല്ലോ' എന്നൊക്കെയാണ് സോഷ്യൽ മീഡിയയിൽ നിറയുന്ന കമന്റുകൾ.

സജീവ രാഷ്ട്രീയ പ്രവർത്തനത്തിലേക്ക് ഇറങ്ങിയ വിജയ്‍യുടെ സിനിമാ കരിയറിലെ അവസാന ചിത്രം കൂടിയാണിത്. അനിരുദ്ധ് ആണ് ചിത്രത്തിന്റെ സംഗീത സംവിധാനം നിർവഹിക്കുന്നത്. ബോബി ഡിയോൾ, പൂജ ഹെ​ഗ്ഡെ, പ്രകാശ് രാജ്, ഗൗതം വാസുദേവ് മേനോൻ, നരേൻ, പ്രിയ മണി, മമിത ബൈജു തുടങ്ങി വമ്പൻ താരനിരയാണ് ചിത്രത്തിലുള്ളത്. സത്യൻ സൂര്യൻ ആണ് ഛായാ​ഗ്രഹണമൊരുക്കുന്നത്.