

മമ്മൂട്ടിയുടെ കളങ്കാവലിന് വേണ്ടി കട്ട വെയിറ്റിങ്ങിലാണ് ആരാധകരും മലയാള സിനിമാ പ്രേക്ഷകരും. ഡിസംബർ അഞ്ചിന് ചിത്രം തിയറ്ററുകളിലെത്തും. കളങ്കാവൽ റിലീസിനോടനുബന്ധിച്ച് പ്രൊമോഷൻ പരിപാടികളും അണിയറപ്രവർത്തകർ തുടങ്ങിക്കഴിഞ്ഞു. ചിത്രത്തിൽ മമ്മൂട്ടിക്കൊപ്പം ഒരു പ്രധാന വേഷത്തിൽ നടൻ വിനായകനും എത്തുന്നുണ്ട്.
ഇപ്പോഴിതാ മമ്മൂട്ടിയ്ക്കൊപ്പം വർക്ക് ചെയ്യാൻ തനിക്ക് വളരെ എളുപ്പമായിരുന്നുവെന്ന് പറയുകയാണ് വിനായകൻ. ചിത്രത്തിന്റെ ഭാഗമായി മമ്മൂട്ടി കമ്പനിക്ക് നൽകിയ അഭിമുഖത്തിൽ സംസാരിക്കുകയായിരുന്നു വിനായകൻ. "മമ്മൂക്കയുമായി വർക്ക് ചെയ്യാൻ ഭയങ്കര എളുപ്പമാണ്. അദ്ദേഹം വളരെ സൂപ്പർ സീനിയറാണ്.
അദ്ദേഹത്തിന് അറിയാം കാര്യങ്ങളെല്ലാം. എനിക്ക് ഭയങ്കര എളുപ്പമായിരുന്നു അദ്ദേഹത്തിനൊപ്പം അഭിനയിക്കാൻ. സാറിനോട് ഞാൻ വളരെയധികം നന്ദി പറയുന്നു. സാർ വരുന്നതിന് മുൻപ് തന്നെ ആ കഥാപാത്രത്തിന് ഞാനൊരു ബോഡി ലാങ്വേജ് പിടിച്ചിട്ടുണ്ടായിരുന്നു. സാർ വന്ന ശേഷം ഡയലോഗ് കുറേയൊക്കെ മാറി, സാർ ചെയ്ത് നല്ല അനുഭവം ഉള്ള ആളാണല്ലോ.
അതെനിക്ക് വളരെയധികം ഗുണം ചെയ്തു. അത്രയൊന്നും പറയണ്ട, അല്ലെങ്കിൽ ഇത്രയും പറഞ്ഞാൽ മതി എന്നൊക്കെ അദ്ദേഹം എനിക്ക് പറഞ്ഞു തന്നു. ഡയലോഗ് പറയാനാണ് സാർ എന്നെ കൂടുതൽ സഹായിച്ചത്". - വിനായകൻ പറഞ്ഞു. പൊതുവേദികളിലൊന്നും താൻ വരാത്തതിന്റെ കാരണവും വിനായകൻ പറഞ്ഞു.
"സിനിമ, സിനിമയുടെ ബിസിനസ്. അതാണ് പ്രധാനമായും ഞാൻ നോക്കാറുള്ളത്. എനിക്ക് ജനങ്ങൾക്ക് മുന്നിൽ സംസാരിക്കാനറിയില്ല. പൊതുവേദിയിൽ സംസാരിക്കാൻ അറിയില്ല. അതിന്റേതായ കുറേ പ്രശ്നങ്ങളുണ്ട്. പൊതുവേദികളിൽ എത്താൻ താല്പര്യമില്ലെന്നല്ല, താല്പര്യമുണ്ട്. പക്ഷേ പറ്റുന്നില്ല.
പിന്നെ പത്ത് പേരിൽ രണ്ടു പേർ എന്നെ ചൊറിയും. എന്റെ സ്വഭാവം അനുസരിച്ച് ഞാൻ എന്തെങ്കിലും പറയും, അത് പ്രശ്നമാവും. അതിനെക്കാൾ നല്ലത് വീടിനകത്ത് ഇരിക്കുന്നതാണ്. ആൾക്കൂട്ടം കാണുന്നത് എനിക്ക് അത്ര ഇഷ്ടമുള്ള കാര്യമല്ല. എനിക്കത് കൈകാര്യം ചെയ്യാൻ അറിയില്ല. ശരിക്കും അതെന്റെ പ്രശ്നമാണ്.
ഞാനായിട്ട് പുറത്തിറങ്ങുമ്പോൾ വേറെ പ്രശ്നങ്ങളുണ്ടാകുന്നുണ്ട്. അതാണ് യാഥാർത്ഥ്യം. അല്ലാതെ നാട്ടുകാരെ വിട്ടിട്ട് ഓടുന്നതല്ല. എന്റെ കഴിവുകേടാണത്. അല്ലാതെ ആരോടും ദേഷ്യമില്ല", വിനായകൻ കൂട്ടിച്ചേർത്തു. ജിതിൻ കെ ജോസ് സംവിധാനം ചെയ്യുന്ന കളങ്കാവല് മമ്മൂട്ടി കമ്പനിയുടെ ബാനറിൽ നിർമിക്കുന്ന ഏഴാമത്തെ ചിത്രമാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates