ആശുപത്രികൾ എന്തിനാണ് മതം ചോദിക്കുന്നത്?, നാണക്കേട്; വിമർശനവുമായി ഖാലിദ് റഹ്മാൻ

ആശുപത്രികൾ മതം ചോദിക്കുന്നതിനെതിരെ വിമർശനവുമായി സംവിധായകൻ ഖാലിദ് റഹ്മാൻ. ചെക്കപ്പിനു മുൻപ് പൂരിപ്പിച്ചു നൽകേണ്ട അപേക്ഷ ഫോറത്തിലാണ് മതം ചോദിച്ചിരിക്കുന്നത്. ഈ ഫോറത്തിന്റെ ചിത്രം സഹിതമാണ് ഖാലിദ് റഹ്മാന്റെ പോസ്റ്റ്. 

ഒരു ചെക്കപ്പിന് മുമ്പ് ആശുപത്രിക്കാര്‍ എന്തിനാണ് മതം അന്വേഷിക്കുന്നത്, നാണക്കേട്- എന്ന കുറിപ്പിലാണ് അദ്ദേഹം അപേക്ഷ ഫോറത്തിന്റെ ചിത്രം പങ്കുവെച്ചത്. മതം ചോദിക്കുന്ന കോളത്തിൽ ഇല്ല എന്നു എഴുതിയിരിക്കുന്നതും കാണാം. മെഡിക്കൽ ട്രസ്റ്റ് ആശുപത്രിയിൽ അച്ഛനെ കാണിക്കാനായാണ് അദ്ദേഹം എത്തിയത്. 

എന്തായാലും ഖാലിദ് റഹ്മാന്റെ പോസ്റ്റ് സോഷ്യൽ മീഡിയയിൽ ശ്രദ്ധ നേടുകയാണ്. നിരവധി പേരാണ് താരത്തെ പിന്തുണച്ചുകൊണ്ട് രം​ഗത്തെത്തുന്നത്. അനുരാഗ കരിക്കിൻ വെള്ളം എന്ന സിനിമയിലൂടെയാണ് ഖാലിദ് റഹ്‍മാൻ സംവിധായകനാകുന്നത്. ചിത്രം മികച്ച വിജയമായതിന് പിന്നാലെ മമ്മൂട്ടിയെ നായകനാക്കി ഉണ്ട എന്ന സിനിമയും സംവിധാനം ചെയ്തു. ലവ് എന്ന ചിത്രമാണ് ഖാലിദ് റഹ്‍മാന്റെ സംവിധാനത്തില്‍ ഏറ്റവും ഒടുവില്‍ പ്രദര്‍ശനത്തിന് എത്തിയത്.