അടുത്ത ദിലീപ് ചിത്രം നാദിര്‍ഷയുമൊത്ത്; കേശു ഈ വീടിന്റെ നാഥന്‍ 

ദീര്‍ഘകാല സുഹൃത്തുക്കളായ ദിലീപും നാദിര്‍ഷയും ഒന്നിച്ചുള്ള ചിത്രം എപ്പോഴാണെന്ന ആരാധകരുടെ ചോദ്യങ്ങള്‍ അവസാനിപ്പിക്കുന്നതാണ് പുറത്തുവരുന്ന വാര്‍ത്തകള്‍. കേശു ഈ വീടിന്റെ നാഥന്‍ എന്ന് ഇപ്പോള്‍ പേരിട്ടിട്ടുള്ള ചിത്രം അടുത്ത വര്‍ഷം ഏപ്രിലോടെ ആരംഭിക്കുമെന്നാണ് ലഭ്യമാകുന്ന വിവരം. തൊണ്ടിമുതലും ദൃക്‌സാക്ഷിയും എന്ന ദിലീഷ് പോത്തന്‍ ചിത്രത്തിന് തിരകഥയെഴുതിയ സജീവ് പാഴൂരാണ് ദിലീപ്-നാദിര്‍ഷാ ചിത്രത്തിന്റെയും തിരകഥാകൃത്ത്. 

ചിത്രത്തേകുറിച്ച് ഔദ്യോഗിക അറിയിപ്പൊന്നും ഉണ്ടായിട്ടില്ലെങ്കിലും ഇതുസംബന്ധിച്ച ചര്‍ച്ചകള്‍ പുരോഗമിക്കുകയാണെന്നാണ് ദിലീപിനോട് അടുത്ത വൃത്തങ്ങള്‍ നല്‍കുന്ന വിവരം. നടിയെ ആക്രമിച്ച സംഭവത്തെതുടര്‍ന്ന് ദിലീപ് അറസ്റ്റിലായതോടെ മുടങ്ങിയ പ്രൊഫസര്‍ ഡിങ്കന്റെ ഷൂട്ടിംഗ് പൂര്‍ത്തീകരിച്ചതിന് ശേഷം നാദിര്‍ഷയുമൊത്തുള്ള ചിത്രം ആരംഭിക്കുമെന്നാണ് അറിയാന്‍ കഴിയുന്നത്. രതീഷ് അമ്പാട്ടിന്റെ കമാരസംഭവം എന്ന ചിത്രമാണ് ദിലീപ് ഇപ്പോള്‍ അഭിനയിച്ചുകൊണ്ടിരിക്കുന്നത്. ഇതിനുപുറമേ അജയ് വാസുദേവന്‍ സംവിധാനം ചെയ്യുന്ന ചിത്രത്തിലും ദിലീപ് കരാര്‍ ഒപ്പിട്ടെന്ന് റിപ്പോര്‍ട്ടുകളുണ്ട്.