'അത് ഞാനല്ലേ, അല്ലേ'; സണ്ണിയെ ഞെട്ടിച്ച് ​ഗൗരി; അനുഗ്രഹീതന്‍ ആന്റണി ടീസർ പുറത്ത്

സണ്ണി വെയിനും ​ഗൗരി കിഷനും പ്രധാനവേഷത്തിൽ എത്തുന്ന അനു​ഗ്രഹീതൻ ആന്റണിയുടെ ടീസർ പുറത്ത്. സണ്ണിയുടെ പിറന്നാളിനോട് അനുബന്ധിച്ചാണ് ടീസർ പുറത്തിറക്കിയത്. നടൻ പൃഥ്വിരാജാണ് ടീസർ റിലീസ് ചെയ്തത്. ചിത്രത്തിലെ മനോഹരമായ പ്രപ്പോസൽ രം​ഗമാണ് പുറത്തുവിട്ടിരിക്കുന്നത്. 

ആന്റണിയായി സണ്ണി വെയ്ന്‍ എത്തുമ്പോൾ സഞ്ജനയായി ഗൗരി വേഷമിടുന്നു. ഇരുവരുടേയും പ്രണയമാണ് ചിത്രത്തിൽ പറയുന്നത്. ഏട്ടുകാലി, ഞാന്‍ സിനിമാ മോഹി എന്നീ ഹ്രസ്വ ചിത്രങ്ങളിലൂടെ ശ്രദ്ധേയനായ പ്രിന്‍സ് ജോയി ആണ് ഈ ചിത്രം സംവിധാനം ചെയ്യുന്നത്. നവീന്‍ ടി. മണിലാലാണ് ചിത്രത്തിന് തിരക്കഥ ഒരുക്കിയിരിക്കുന്നത്. സിദ്ധിഖ്, സുരാജ് വെഞ്ഞാറമൂട്, ഇന്ദ്രന്‍സ്, ജാഫര്‍ ഇടുക്കി, മാലാ പാര്‍വതി തുടങ്ങിയവരാണ് സിനിമയിലെ മറ്റു പ്രധാന താരങ്ങള്‍.

സൂപ്പർഹിറ്റ് ചിത്രം 96 ൽ ബാലതാരമായി എത്തിയ ​ഗൗരി കിഷോറിന്റെ രണ്ടാമത്തെ മലയാളം ചിത്രമാണ് ഇത്. നേരത്തെ ചിത്രത്തിന്റെ പാട്ട് സൂപ്പർഹിറ്റായിരുന്നു. തുടർന്ന് ചിത്രത്തിനുവേണ്ടി കാത്തിരിക്കുകയായിരുന്നു ആരാധകർ. ലക്ഷ്യ എന്റര്‍ടെയ്ന്‍മെന്‍സ് റെറ്റ്‌കോണ്‍ സിനിമാസുമായി ചേര്‍ന്ന് എം. ഷിജിത്താണ് ചിത്രം നിർമിക്കുന്നത്. ശെല്‍വകുമാര്‍ എസ്. ഛായാഗ്രഹണവും അപ്പു ഭട്ടതിരി എഡിറ്റിങ്ങും നിര്‍വഹിക്കുന്നു.