'കണ്ണനായാല്‍ രാധ വേണം'; കൃഷ്ണന്‍മാര്‍ക്കൊപ്പം രാധയായി ഭാവന, ചിത്രങ്ങള്‍

ശ്രീകൃഷ്ണജയന്തി ദിനത്തില്‍ രാധയായി വേഷം മാറി ആരാധകരെ ഞെട്ടിച്ച് നടി ഭാവന. വെള്ള വസ്ത്രങ്ങളും അതിനിണങ്ങുന്ന വെള്ള മുത്ത് പിടിപ്പിച്ച ആഭരണങ്ങളുമാണ് ഈ സുന്ദരി രാധയുടെ വേഷം. താരം ഇന്‍സ്റ്റഗ്രാമില്‍ പങ്കുവെച്ച ചിത്രങ്ങള്‍ ചുരുങ്ങിയ സമയം കൊണ്ടുതന്നെ സമൂഹമാധ്യമങ്ങളില്‍ തരംഗമായി.

വെള്ള നിറത്തിലുള്ള ഒരു ദാവണിയാണ് ഭാവനയുടെ വേഷം. നെറ്റിച്ചുട്ടിയും മുല്ലപ്പൂവും അതിന്റെ മാറ്റ് കൂട്ടി. കൃഷ്ണവേഷം കെട്ടിയ കുട്ടികള്‍ക്കൊപ്പം ഇരിക്കുകയാണ് താരം. ശ്രീകോവിലിന് മുന്‍പിലെന്ന് തോന്നിക്കുന്ന വിധമുള്ള സ്ഥലത്തു നിന്നുള്ളതാണ് ചിത്രങ്ങള്‍. 

വിവാഹത്തിന് ശേഷം കന്നട സിനിമയില്‍ സജീവമായ താരം തമിഴ് ചിത്രം 96ന്റെ കന്നട റീമേക്ക് 99 ലാണ് അവസാനമായി വേഷമിട്ടത്. ഗണേഷായിരുന്നു ചിത്രത്തിലെ നായകന്‍. ഇന്‍സ്‌പെക്ടര്‍ വിക്രം, ഭംജ്രംഗി 2 തുടങ്ങിയവയാണ് ഭാവനയുടെ പുതിയ ചിത്രങ്ങള്‍. 

2017ല്‍ പുറത്തിറങ്ങിയ ആദം ജോണ്‍ ആയിരുന്നു ഭാവന അവസാനമായി അഭനിയിച്ച മലയാള ചിത്രം. ഇപ്പോള്‍ ഇന്‍സ്റ്റഗ്രാമിലൂടെ തങ്ങളുടെ പ്രിയപ്പെട്ട താരത്തിന്റെ വിശേഷങ്ങള്‍ അറിയാറുണ്ടെങ്കിലും ഒരു തിരിച്ചുവരവിന് വേണ്ടി കാത്തിരിക്കുകയാണ് മലയാളി ആരാധകര്‍.