ചരിത്രം പറഞ്ഞ് സൽമാൻ ചിത്രം; 'ഭാരത്' ട്രെയിലർ പുറത്ത് 

ആരാധകർ ഏറെ പ്രതീക്ഷയോടെ കാത്തിരിക്കുന്ന സൽമാൻ ചിത്രം ഭാരതിന്റെ ട്രെയിലർ പുറത്തുവിട്ടു. മൂന്ന് മിനിറ്റിലധികം ദൈർഘ്യമുള്ള വിഡിയോയാണ് അണിയറപ്രവർത്തകർ പുറത്തുവിട്ടിരിക്കുന്നത്. ചിത്രത്തിൽ പ്രതിപാദിക്കുന്ന മൂന്ന് കാലഘട്ടങ്ങളുടെ സൂചന നൽകുന്നതാണ് ട്രെയിലർ.

ആദ്യഭാ​ഗത്ത് സർക്കസ് ട്രൂപ്പിനോടൊപ്പമുള്ള സൽമാന്റെ ആഘോഷമായ ജീവിത കാലഘട്ടമാണ് പ്രതിപാദിക്കുന്നത്. രണ്ടാം ഭാ​ഗത്തിൽ നായകന്റെ മറ്റൊരു വേഷപകർച്ച കാണാം. ജോലി തേടിയുള്ള സൽമാന്റെ അലച്ചിലാണ് ഈ ഭാ​ഗത്തെ പ്രധാന പ്രമേയം. ഇതിനിടയിലാണ് നായിക കത്രീന കൈഫുമായി കണ്ടുമുട്ടുന്നതും പ്രണയത്തിലാകുന്നതും. മൂന്നാം ഭാ​ഗത്തിൽ 1947ലെ ഇന്ത്യ വിഭജനകാലത്ത് അച്ഛന് നൽകിയ ശപഥം നിറവേറ്റാനുള്ള സൽമാന്റെ ശ്രമങ്ങളാണ് അവതരിപ്പിക്കുന്നത്. അതിർത്തിയിൽ നിന്ന് കാണാതായ കുടിയേറ്റക്കാരെ തിരഞ്ഞുപിടിക്കാൻ നേതൃത്വം നൽകുന്ന നായകനെ ഈ ഭാ​ഗത്ത് ക‌ാണാം. 

അലി അബ്ബാസ് സഫർ സംവിധാനം ചെയ്യുന്ന ചിത്രത്തിന്റെ ടീസർ ഇറങ്ങിയപ്പോൾ മുതൽ സിനിമാപ്രേമികൾ പ്രതീക്ഷയിലാണ്. ‘ടൈഗർ സിന്ദാ ഹെ’ എന്ന ചിത്രത്തിനു ശേഷം അലി അബ്ബാസ് സഫർ- സൽമാൻ ഖാൻ- കത്രീന കൈഫ് ടീം വീണ്ടുമൊന്നിക്കുന്ന ചിത്രം കൂടിയാണിത്.