'ചീരു, എന്റെ പുഞ്ചിരിയുടെ കാരണം നീയാണ്'; ചിരഞ്ജീവിയുടെ ചിത്രത്തിനു മുൻപിൽ ഒന്നിച്ച് കുടുംബം, വേർപാടിന്റെ ഒരു മാസം

കന്നട നടൻ ചിരഞ്ജീവി സർജ യാത്രയായിട്ട് ഒരുമാസം പിന്നിടുമ്പോൾ നടന്റെ ഓർമ്മകൾക്ക് മുൻപിൽ ഒത്തുകൂടി കുടുംബം. ചിരഞ്ജീവിയുടെ ആത്മശാന്തിക്കായി നടത്തിയ ചടങ്ങിന്റെ ചിത്രങ്ങൾ ഭാര്യയും നടിയുമായ മേഘ്ന പങ്കുവച്ചു. നടന്റെ ചിത്രത്തിനു മുൻപിൽ പുഞ്ചിരിയോടെ ഇരിക്കുന്ന കുടുംബാംഗങ്ങളുടെ ചിത്രങ്ങളാണ് മേഘ്ന പങ്കുവച്ചത്. 'ചീരു, എന്റെ പുഞ്ചിരിയുടെ കാരണം നീയാണ്', എന്നാണ് ഇതോടൊപ്പം കുറിച്ചിരിക്കുന്നത്.

'പ്രിയപ്പെട്ട ചീരു' എന്നാണ് കുറിപ്പ് തുടങ്ങുന്നത്. "ചീരു എന്നാൽ ആഘോഷമാണ്. എക്കാലത്തും അങ്ങനെയായിരുന്നു. ഇനിയെന്നും അങ്ങനെ തന്നെ ആയിരിക്കും. മറ്റൊരു തരത്തിൽ ആകുന്നത് നിനക്ക് ഇഷ്ടപ്പെടില്ലെന്ന് എനിക്കറിയാം. ചീരു, എന്റെ പുഞ്ചിരിയുടെ കാരണം നീയാണ്. ഏറ്റവും വിലപിടിപ്പുള്ള സമ്മാനമാണ് ചീരു എനിക്കു നൽകിയത്. എന്റെ കുടുംബം. എന്നും നമ്മുടെ കുടുംബം ഒന്നായിരിക്കും. ഓരോ ദിസവും ചീരു ആഗ്രഹിച്ചതു പോലെ തന്നെ ആകും. സ്നേഹവും പൊട്ടിച്ചിരികളും തമാശകളും നേരും കൂട്ടായ്മയും നിറ‍ഞ്ഞ ദിവസങ്ങൾ," മേഘ്ന കുറിച്ചു.

കഴിഞ്ഞ മാസം ഏഴാം തിയതിയാണ് ഹൃദയാഘാതം മൂലം ചിരഞ്ജീവി സർജ അന്തരിച്ചത്. തെന്നിന്ത്യൻ സിനിമാലോകത്തെയും ആരാധകരെയും നടുക്കിയ വാർത്തയായിരുന്നു അത്.