ആരാധകര്‍ ഏറെ ആകാംഷയോടെ കാത്തിരുന്ന ദീപ്‌വീര്‍ വിവാഹചിത്രങ്ങള്‍ എത്തിത്തുടങ്ങി. കാത്തിരിപ്പിന് വിരാമമിട്ട് ദീപിക തന്നെയാണ് ആദ്യ ചിത്രങ്ങള്‍ പങ്കുവച്ചത്. ഇന്നലെ കൊങ്കണി ആചാരപ്രകാരം നടന്ന വിവാഹചടങ്ങിന്റെയും ഇന്ന് നടന്ന സിന്ധി ആചാരപ്രകാരമുള്ള ചടങ്ങിന്റെയും ചിത്രങ്ങളാണ് താരം ആരാധകര്‍ക്കായി സമ്മാനിച്ചിരിക്കുന്നത്.
ചുവന്ന കാഞ്ചീവരം സാരി അണിഞ്ഞാണ് ദീപിക കൊങ്കണി വിവാഹത്തിന് എത്തിയത്. വെള്ള നിറത്തിലുള്ള ദോത്തി കുര്‍ത്തയായിരുന്നു രണ്‍വീറിന്റെ വേഷം. സിന്ധി വിവാഹത്തിന് ഇരുവരും ചുവന്ന വസ്ത്രങ്ങളാണ് അണിഞ്ഞിരുന്നത്. ദീപിക ലെഹങ്കയും രണ്‍വീര്‍ ഷര്‍വാണിയുമാണ് ധരിച്ചത്. ഡിസൈനര്‍ സബ്യസാചി മുഖര്‍ജിയാണ് ഇരുവരുടെയും വിവാഹവസ്ത്രങ്ങള്‍ ഡിസൈന്‍ ചെയ്തത്.
ദീപിക പങ്കുവച്ച ചിത്രങ്ങള്‍ രണ്‍വീറും ഡിസൈനര്‍ സബ്യസാചിയും തീരവിവാഹത്തിന്റെ ചിത്രങ്ങള്‍ പകര്‍ത്തിയ എറിക്കോസ് ആന്‍ഡ്രൂസും ഷെയര്‍ ചെയ്തു. ഇരുവര്‍ക്കും ആശംസകള്‍ നേര്‍ന്നും താരദമ്പതികളെ അഭിനന്ദിച്ചും ബോളിവുഡ് താരങ്ങളും ആരാധകരുമടക്കം നിരവധിപ്പേര്‍ ചിത്രങ്ങള്‍ ഷെയര്‍ ചെയ്തുകഴിഞ്ഞു. പ്രിയങ്ക ചോപ്ര, അലിയ ഭട്ട്, കത്രിന കെയ്ഫ്, അഭിഷേക് ബച്ചന്‍, ശില്‍പ ഷെട്ടി, ജാക്വിലിന്‍ ഫര്‍ണാണ്ടസ്, ബിപാഷ ബസു എന്നിവരടക്കം നിരവധിപ്പേര്‍ ഇരുവര്‍ക്കും ആശംസകള്‍ നേര്‍ന്നു.
ഇറ്റലിയിലെ ലേക് കോമോ റിസോര്‍ട്ടിലായിരുന്നു ബോളിവുഡിന്റെ പ്രണയ ജോഡികളായ ദീപിക പദുക്കോണിന്റെയും രണ്‍വീര്‍ സിങിന്റെയും വിവാഹം. കനത്ത കാവലിലാണ് ദീപികയെ രണ്‍വീര്‍ മിന്നു ചാര്‍ത്തിയത്. വിവാഹവേദിയിലേക്ക് മാധ്യമങ്ങള്‍ക്ക് പ്രവേശനമുണ്ടായിരുന്നില്ല. കൈത്തണ്ടയില്‍ പ്രത്യേകം ബാന്‍ഡ് കെട്ടിയ അതിഥികള്‍ക്ക് മാത്രമായിരുന്നു വിവാഹവേദിയില്‍ പ്രവേശനം. ഫോണില്‍ ലഭിച്ച ക്യൂ ആര്‍ കോഡ് സ്‌കാന്‍ ചെയ്ത് മാത്രമാണ് അതിഥികളെ അകത്തേയ്ക്ക് പ്രവേശിപ്പിച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates