ടൊവിനോയ്ക്ക് അന്താരാഷ്ട്ര പുരസ്കാരം; കാനഡയിൽ തിളങ്ങി 'ആൻഡ് ദി ഓസ്കാർ ​ഗോസ് ടു' 

കാനഡയിലെ ആല്‍ബര്‍ട്ട ഫിലിം ഫെസ്റ്റിവലിൽ പുരസ്കാരങ്ങൾ സ്വന്തമാക്കി സലിം അഹ്മദ് ചിത്രം ആൻഡ് ദി ഓസ്കാർ ​ഗോസ് ടു. സിനിമയിൽ നായക കഥാപാത്രത്തെ അവതരിപ്പിച്ച ടൊവിനോ തോമസ് മികച്ച നടനായും സലിം മികച്ച സംവിധായകനായും തിരഞ്ഞെടുക്കപ്പെട്ടു. മികച്ച സിനിമ, മികച്ച സഹ നടി തുടങ്ങിയ പുരസ്കാരങ്ങളും ചിത്രം സ്വന്തമാക്കി.  

അവാർഡ് നേടിയതിലെ സന്തോഷം ടൊവിനോ പങ്കുവച്ചു. മറ്റൊരു സ്വപ്നവും യാഥാർത്ഥ്യമായി എന്നാണ് അവാർഡ് വാർത്ത പങ്കുവച്ച് ടൊവിനോ സോഷ്യൽ മീഡിയയിൽ കുറിച്ചത്. ‍ഒരു അന്താരാഷ്ട്ര പുരസ്കാരം നേടാനാകുമെന്ന് സ്വകാര്യ സ്വപ്നങ്ങളിൽ പോലും ചിന്തിച്ചിരുന്നില്ലെന്നും ഇത് സങ്കൽപ്പങ്ങൾക്കും അപ്പുറമാണെന്നും താരം കുറിച്ചു.

ആദാമിന്റെ മകന്‍ അബു, കുഞ്ഞനന്തന്റെ കട, പത്തേമാരി എന്നീ സിനിമകള്‍ക്ക് ശേഷം സലിം അഹമ്മദ് സംവിധാനം ചെയ്ത ചിത്രമാണ് ആന്‍ഡ് ദി ഓസ്‌കാര്‍ ഗോസ് ടു. അനു സിത്താരയാണ് ചിത്രത്തിൽ നായിക. ഇസഹാക്ക് ഇബ്രാഹിം എന്നാണ് ടൊവിനോയുടെ കഥാപാത്രത്തിന്റെ പേര്. സിദ്ദീഖ്, സലിം കുമാര്‍, ശ്രീനിവാസന്‍,ലാല്‍, അപ്പാനി രവി തുടങ്ങിയവരാണ് മറ്റ് താരങ്ങള്‍. കേരളത്തിലും കാനഡയിലുമായാണ് സിനിമ ചിത്രീകരിച്ചിരിക്കുന്നത്.