'നിലവാരമുള്ള പാട്ടുണ്ടാക്കാൻ കഴിവില്ല, അതുകൊണ്ടാണ് അവർക്ക് ഇതെല്ലാം സംഭവിക്കുന്നത്'; വിമർശിച്ച് ഇളയരാജ (വിഡിയോ) 

അടുത്ത കാലത്ത് പ്രേക്ഷകർ ഏറ്റവുമധികം നെഞ്ചേറ്റിയ ചിത്രങ്ങളിൽ ഒന്നാണ് 96. സിനിമയ്ക്കൊപ്പം തന്നെ ശ്രദ്ധനേടിയവയായിരുന്നു അതിലെ പാട്ടുകളും. എന്നാൽ 1991ൽ പുറത്തിറങ്ങിയ 'ദളപതി' എന്ന ചിത്രത്തിലെ ​ഗാനം ഉപയോ​ഗിച്ചതിന് 96നെതിരെ വിമർശനം ഉന്നയിച്ചിരിക്കുകയാണ് ഇളയരാജ. 

ദളപതിയിലെ 'യമുനൈ ആട്രിലെ' എന്ന ​ഗാനമാണ് 96ലൂടെ വീണ്ടും പ്രേക്ഷകരിലേക്കെത്തിയത്. എന്നാൽ അത് ഭയങ്കര തെറ്റാണെന്നാണ് ഇളയരാജയുടെ വാക്കുകൾ. "ഏതൊ ഒരു കാലത്ത് നടക്കുന്ന കാര്യങ്ങള്‍ കാണിക്കാന്‍ ആ കാലത്ത് ഇറങ്ങിയ പാട്ടുകള്‍ ഉപയോഗിക്കേണ്ട ആവശ്യമില്ല. അന്നത്തെ പാട്ടുകളുടെ നിലവാരത്തിലുള്ള നല്ല പാട്ടുകളുണ്ടാക്കാനുള്ള കഴിവില്ലാത്തത് കൊണ്ടാണ് ഇതെല്ലാം സംഭവിക്കുന്നത്", അദ്ദേഹം പറഞ്ഞു. സിനിമ എക്സ്പ്രസിന് നൽകിയ അഭിമുഖത്തിലായിരുന്നു തുറന്നുപറച്ചിൽ. 

1973ല്‍ പുറത്തിറങ്ങിയ 'യാദോം കീ ബാരാത്' എന്ന ചിത്രത്തിന്റെ സം​ഗീതത്തെ ചൂണ്ടിക്കാട്ടി ഇളയരാജ ഇക്കാര്യം കൂടുതൽ വിശദമാക്കി. ഇരുപതു വര്‍ഷം മുമ്പത്തെ ഒരു ഗാനത്തിന്റെ ആവശ്യമുണ്ടായപ്പോൾ അന്ന് പുതിയ പാട്ട് സൃഷ്ടിക്കുകയാണ് ചെയ്തത് എന്ന് അദ്ദേഹം പറഞ്ഞു. "ഇരുപതു വര്‍ഷം മുമ്പുള്ള ഏതെങ്കിലും കമ്പോസറുടെ പാട്ട് അന്ന് ഉപയോ​ഗിക്കാമായിരുന്നു. പക്ഷെ പുതിയൊരു പാട്ട് ചിട്ടപ്പെടുത്തുകയാണ് ചെയ്തത്", അദ്ദേഹം ചൂണ്ടിക്കാട്ടി.