മഞ്ജുവിന്റെ 'പ്രതി പൂവൻ കോഴി' അന്യഭാഷകളിലേക്ക്; റീമേക്ക് അവകാശം സ്വന്തമാക്കി ബോണി കപൂർ

മഞ്ജുവാര്യരും റോഷൻ ആൻഡ്രൂസും ഒന്നിച്ച പ്രതി പൂവൻ കോഴി മലയാളത്തിൽ മികച്ച അഭിപ്രായം നേടിയിരുന്നു. ഇപ്പോൾ ഇതാ ചിത്രം അന്യ ഭാഷകളിലേക്ക് റീമേക്ക് ചെയ്യാൻ ഒരുങ്ങുകയാണ്. ബോളിവുഡിലെ സൂപ്പർഹിറ്റ് നിർമാതാവ് ബോണി കപൂറാണ് ചിത്രത്തിന്റെ റീമേക്ക് അവകാശം സ്വന്തമാക്കിയത്. 

തമിഴ്, തെലുങ്ക്,കന്നഡ, ഹിന്ദി ഭാഷകളിലെ റീമേക്ക് അവകാശമാണ് ബോണി കപൂര്‍ പ്രൊഡക്ഷന്‍സ് സ്വന്തമാക്കിയത്. ബോളിവുഡിലെ ഏറ്റവും വലിയ നിര്‍മാണക്കമ്പനിയാണ് ബോണി കപൂര്‍ പ്രൊഡക്ഷന്‍സ് നേരത്തെ അന്ന ബെൻ നായികയായി എത്തിയ ഹെലന്റെയും റീമേക്ക് അവകാശം സ്വന്തമാക്കിയിരുന്നു. 

മഞ്ജു വാര്യരും അനുശ്രീയും പ്രധാന വേഷത്തിൽ എത്തിയ ചിത്രത്തിൽ വില്ലൻ കഥാപാത്രമായി എത്തിയത് റോഷൻ ആൻഡ്രൂസ് തന്നെയാണ്. മാധുരി എന്ന സെയിൽസ് ഗേൾ ആയാണ് മഞ്ജു ചിത്രത്തിൽ എത്തിയത്. തനിക്ക് നേരിടുന്ന അതിക്രമത്തിന് പ്രതികാരം ചെയ്യാൻ ഇറങ്ങിത്തിരിക്കുന്ന മാധുരിയെക്കുറിച്ചാണ് ചിത്രത്തിൽ പറയുന്നത്. ശ്രീ ഗോകുലം മൂവീസിന്റെ ബാനറില്‍  ഗോകുലം ഗോപാലന്‍ ആയിരുന്നു ചിത്രത്തിന്റെ നിര്‍മാണം. അലന്‍സിയര്‍, ഷൈജു കുറുപ്പ്, ഗ്രേസ് ആന്റണി എന്നിവരും കഥാപാത്രങ്ങളായി എത്തി.