മയക്കുമരുന്ന് കേസ്; ശ്രദ്ധ കപൂറിനേയും സാറ അലി ഖാനെയും ചോദ്യം ചെയ്തേക്കും

സുശാന്ത് സിങ് രാജ്പുത്തിന്റെ മരണവുമായി ബന്ധപ്പെട്ട മയക്കുമരുന്ന് കേസിൽ ബോളിവുഡിലെ കൂടുതൽ നടിമാരെ ചോദ്യം ചെയ്ത‌േക്കും. യുവതാരങ്ങളായ ശ്രദ്ധ കപൂർ, സാറ അലി ഖാൻ എന്നിവരെ ഈ ആഴ്ച ചോദ്യം ചെയ്യാൻ വിളിപ്പിച്ചേക്കുമെന്നാണ് റിപ്പോർട്ടുകൾ. അറസ്​റ്റിലായ റിയ ചക്രബർത്തിയെ ചോദ്യം ചെയ്തപ്പോൾ ഇരുവരുടേയും പേരുകൾ പരാമർശിക്കപ്പെട്ടുവെന്നാണ് വിവരം. 

നർക്കോട്ടിക് കൺട്രോൾ ബ്യൂറോ ഇരുവർക്കും ഈ ആഴ്​ച തന്നെ ഹാജരാകാൻ സമൻസ്​ അയച്ചേക്കുമെന്നാണ് അടുത്തവൃത്തങ്ങളെ പരാമർശിച്ചുകൊണ്ട്​ എൻഡിടിവി റിപ്പോർട്ട്​ ​ചെയ്യുന്നത്. റിയ ചക്രബര്‍ത്തിയുടെ വാട്‌സ്ആപ്പ് സന്ദേശം പുറത്തായതിന് പിന്നാലെയാണ് സുശാന്തിന്റെ മരണത്തിലെ മയക്കുമരുന്നുകടത്തുമായുള്ള ബന്ധം സംശയിച്ച് ആദ്യ കേസ് രജിസ്റ്റര്‍ ചെയ്തത്. ഈ കേസിലാണ് നടിമാരെ ചോദ്യം ചെയ്യുക. ഇവരെ കൂടാതെ മറ്റ് ചില താരങ്ങളുടെ പേരും അന്വേഷണ സംഘത്തിന് ലഭിച്ചിട്ടുണ്ട്.

സുശാന്ത്​ സിങ്ങിനൊപ്പം റിയ നിരവധി പാർട്ടികളിൽ പ​ങ്കെടുത്തതായി നാർക്കോട്ടിക്​സ്​ കൺട്രോൾ ബ്യൂറോ അറിയിച്ചിരുന്നു. സാറ അലി ഖാനും ശ്രദ്ധ കപൂറും ഈ പാർട്ടികളിൽ പ​ങ്കെടുത്തെന്ന്​ എൻസിബിക്ക്​ വിവരം ലഭിച്ചതായി ദേശീയ മാധ്യമങ്ങൾ റിപ്പോർട്ട്​ ചെയ്​തിരുന്നു. ഈ പാർട്ടികളിൽ ലഹരി ഉപയോഗം നടന്നിട്ടുണ്ടോയെന്നാണ്​ എൻസിബി അന്വേഷിക്കുന്നത്​. മൂന്നുദിവസത്തെ ചോദ്യം ചെയ്യലിനുശേഷം സെപ്റ്റംബർ ഒമ്പതിനാണ് റിയ അറസ്റ്റിലാവുന്നത്.  റിയയും സഹോദരൻ ഷോവിക് ചക്രബർത്തിയും ഉൾപ്പടെ കേസിൽ ഇതുവരെ പത്തു പേർ അറസ്റ്റിലായിട്ടുണ്ട്.