വിശന്ന് കൈനീട്ടിയ കുട്ടിക്ക് ബിസ്ക്കറ്റും പണവും നൽകി ജാൻവി; വിഡിയോ  

സോഷ്യൽ മീഡിയയിൽ ഏറ്റവുമധികം ആരാധകരുള്ള ബോളിവുഡ് ‌യുവതാരങ്ങളിൽ ഒരാളാണ് ജാൻവി കപൂർ. ആരാധകരുമായി വളരെ അടുത്ത ബന്ധം പുലർത്തുന്ന ജാൻവി സോഷ്യൽ ലോകത്ത് എന്നതുപോലെതന്നെ നേരിൽ കാണുമ്പോഴും എല്ലാവരോടും സ്നേഹം പ്രകടിപ്പിക്കാറുണ്ട്. തിരക്കുകൾക്കിടയിലും ആരാധകരുമായി സംസാരിക്കാനും ചിത്രം പകർത്താനും ജാൻവി സമയം കണ്ടെത്തും. ജിം കഴി‍ഞ്ഞിറങ്ങുന്ന താരത്തോടൊ‌പ്പം നിന്ന് ഫോട്ടോ എടുത്ത സന്തോഷം പങ്കുവയ്ക്കുന്ന നിരവധി പേരെ സോഷ്യൽ മീഡിയയിൽ കാണാൻ സാധിക്കും. ഇപ്പോഴിതാ തന്റെ അടുത്ത് വിശന്നെത്തിയ കുട്ടിക്ക് ഭക്ഷണം നൽകുന്ന താരത്തിന്റെ വിഡിയോയാണ് വൈറലാകുന്നത്. 

ബ്യൂട്ടീപാർലറിൽ പോകാൻ എത്തിയ ജാൻവിക്ക് മുന്നിൽ കൈനീട്ടിയ തെരുവ് ബാലന് ബിസ്ക്കറ്റും പണവും നൽകുന്ന താരത്തിന്റെ വിഡിയോയാണ് സമൂഹ​മാധ്യമങ്ങളിൽ വൈറലാകുന്നത്. കാറിൽ നിന്ന് ഇറങ്ങിവരുമ്പോഴായിരുന്നു ജാൻവിക്ക് മുന്നിൽ കുട്ടിയെത്തി വിശക്കുന്നെന്ന് പറഞ്ഞത്. പെട്ടന്നു തന്നെ തന്റെ വണ്ടിയിൽ ഉണ്ടായിരുന്ന ബിസ്ക്കറ്റ് പായ്ക്കറ്റ് എടുത്ത് നൽകുകയായിരുന്നു താരം. 

പാർലറിലേക്ക് കേറുന്നതിന് മുമ്പ് കുട്ടിയുടെ അമ്മ ജാൻവിയോട് പണം ചോദിക്കുന്നതും വിഡിയോയിൽ കാണാം‌. സലൂണിലേയ്ക്ക് കയറിപ്പോയെങ്കിലും തിരികെയെത്തി കുട്ടിയുടെ കൈയ്യിൽ പൈസ നൽകുകയായിരുന്നു ജാൻവി. താരത്തിന്റെ ഈ പ്രവർത്തിയെ അഭിനന്ദിച്ച് നിരവധി പേരാണ് എത്തുന്നത്.