'ഹിന്ദു മതവികാരം വ്രണപ്പെടുത്തി'; ആലിയയ്ക്കും മഹേഷ് ഭട്ടിനുമെതിരേ പരാതി 

മതവികാരം വ്രണപ്പെടുത്തിയെന്നാരോപിച്ച് സഡക് 2 നിർമ്മാതാക്കളായ മഹേഷ് ഭട്ട്, മുകേഷ് ഭട്ട് എന്നിവർക്കും നടി ആലിയ ഭട്ടിനുമെതിരെ പരാതി. സിനിമയുടെ പോസ്റ്റർ ഹിന്ദുമത വികാരത്തെ വ്രണപ്പെടുത്തിയെന്നാരോപിച്ചാണ് പരാതി നൽകിയിരിക്കുന്നത്. കൈലാസ് മാനസരോവറിന്റെ ചിത്രമാണ് പോസ്റ്ററിൽ ഉപയോ​ഗിച്ചിരിക്കുന്നത്.  

മുസഫർപൂർ സ്വദേശിയായ ചന്ദ്ര കിഷോർ പരാശർ എന്നയാളാണ് പരാതി നൽകിയിരിക്കുന്നത്. മത വികാരങ്ങളെ മനഃപൂർവ്വം പ്രകോപിപ്പിക്കൽ (ഐപിസി 295 എ), ക്രിമിനൽ ഗൂഢാലോചന (120 ബി ) എന്നിവ പ്രകാരമാണ് കേസ് ഫയൽ ചെയ്തിരിക്കുന്നത്. കേസിൽ മുസഫർപൂർ ചീഫ് ജുഡീഷ്യൽ മജിസ്‌ട്രേറ്റ് കോടതി ജൂലൈ 8 ന് വീണ്ടും വാദം കേൾക്കും. 

ആലിയയ്ക്ക് പുറമേ സഞ്ജയ് ദത്ത് ,പൂജാ ഭട്ട് , ആദിത്യ റോയ് കപൂർ എന്നിവരാണ്  'സഡക് 2'ലെ അഭിനേതാക്കൾ. ഇരുപതു വർഷത്തിന് ശേഷം മഹേഷ് ഭട്ട് സംവിധാനം ചെയ്യുന്ന ചിത്രമെന്ന പ്രത്യേകതയും സിനിമയ്ക്കുണ്ട്. ആദ്യമായാണ് ആലിയ മഹേഷ് ഭട്ട് ചിത്രത്തിൽ അഭിനയിക്കുന്നതും. 

1991-ൽ പുറത്തിറങ്ങിയ സഡക്കിന്റെ രണ്ടാം ഭാ​ഗമാണ് പുതിയ ചിത്രം. 29  മുമ്പിറങ്ങിയ സിനിമയിൽ മഹേഷ് ഭട്ടിന്റെ സംവിധാനത്തിൽ സഞ്ജയ് ദത്തും പൂജാഭട്ടും ജോഡികളായി അഭിനയിച്ചു. ഓൺലൈൻ റിലീസിന് ഒരുങ്ങുന്ന ചിത്രം ഹോട്ട്സ്റ്റാറിലൂടെ പ്രേക്ഷകരിലേക്കെത്തു.റിലീസ് തിയതി പ്രഖ്യാപിച്ചിട്ടില്ല.