ദുബൈ - കോഴിക്കോട് എയർ ഇന്ത്യാ സർവീസ് റദ്ദാക്കി; 4 മണിക്കൂർ വിമാനത്തിനുള്ളിൽ വലഞ്ഞ് യാത്രക്കാർ

ദുബൈ: ഇന്ന് രാവിലെ ദുബൈയിൽ നിന്ന്​ കോഴിക്കോടേക്ക്​ പുറപ്പെടേണ്ട എയർ ഇന്ത്യ എക്സ്​പ്രസ്​ വിമാനം റദ്ദാക്കിയാതായി അധികൃതർ അറിയിച്ചു. എ സി പോലും പ്രവർത്തിപ്പിക്കാതെ 4 മണിക്കൂർ വിമാനത്തിനുള്ളിൽ കഴിഞ്ഞ ശേഷമാണു യാത്രക്കാരോട് വിമാനം റദ്ദാക്കിയ വിവരം അധികൃതർ അറിയിച്ചത്. ഇത് വലിയ പ്രതിഷേധത്തിന് ഇടയാക്കി.

വിമാനത്തിൽ യാത്രക്കാരെ പ്രവേശിച്ച ശേഷം പുറപ്പെടുന്നതിന്​ തൊട്ട് മുൻപാണ് സാ​ങ്കേതിക തകരാർ കണ്ടെത്തിയത്​. ഇതോടെ രാവിലെ 8.15ന്​ വിമാനത്തിൽ പ്രവേശിച്ച യാത്രക്കാർ നാലു മണിക്കൂർ കൊടുംചൂടിൽ വിമാനത്തിനകത്ത്​ കഴിയേണ്ടി വന്നു. വിമാനത്തിൽ എ സി പ്രവർത്തിച്ചിരുന്നില്ലെന്നും,കുട്ടികൾക്കും,പ്രായം ചെന്നവർക്കും വലിയ ബുദ്ധിമുട്ട് നേരിടേണ്ടി വന്നെന്നും യാത്രക്കാർ വ്യക്തമാക്കി.

സാങ്കേതിക കാരണങ്ങളാൽ വിമാനം റദ്ദാക്കി എന്ന വിവരം ഉച്ചക്ക് 12.15നാണ് യാത്രക്കാർക്ക് ലഭിക്കുന്നത്. തുടർന്ന്​ യാത്രക്കാരെ ഹോട്ടലിലേക്ക്​ മാറ്റി. വിമാനത്തിൽ സാ​ങ്കേതിക പ്രശ്നം കണ്ടെത്തിയതിനെ തുടർന്നാണ്​ യാത്ര റദ്ദാക്കിയതെന്നും യാത്രക്കാർക്ക്​ പകരം സംവിധാനം ഒരുക്കിയിട്ടുണ്ടെന്നും എയർ ഇന്ത്യ എക്സ്​പ്രസ്​ വക്​താവ്​ അറിയിച്ചു.