യു എ ഇ ദേശീയ ദിനം: ദുബൈയ്ക്ക് പുറമെ അബുദാബിയിലും പാർക്കിങ് സൗജന്യം

അബുദാബി: യു എ ഇ ദേശീയ ദിനാഘോഷത്തിന്റെ ഭാഗമായി ഇന്ന് (നവംബർ 30) മുതൽ തുടർച്ചയായി മൂന്ന് ദിവസം അബൂദബിയിൽ പാർക്കിങ് സൗജന്യമാകുമെന്ന് അധികൃതർ അറിയിച്ചു. ഈ ദിവസങ്ങളിൽ ദർബ് ടോൾ ഗേറ്റുകളും ഫീസ് ഈടാക്കില്ല. നവംബർ 30, ഡിസംബർ 1, 2 തീയതികളിലാണ് സൗജന്യ പാർക്കിങ് ലഭ്യമാകുന്നത്.

പാർക്കിങ് ഫീസുകളും ടോൾ ചാർജുകളും ഡിസംബർ 3 മുതൽ പഴയ രീതിയിൽ പുനരാരംഭിക്കും. പാർക്കിംഗ് കമ്പനി ആയ ക്യു മൊബിലിറ്റിയും സർക്കാരുമായി സഹകരിച്ചാണ് സൗജന്യ പാർക്കിങ് ഒരുക്കിയിരിക്കുന്നത്. പൊതുജനങ്ങൾക്ക് ദേശീയ ദിന അവധി കൂടുതൽ സൗകര്യപ്രദമാക്കാനുള്ള ശ്രമത്തിന്റെ ഭാഗമായി ആണ് ഈ തീരുമാനം.

ദുബൈ റോഡ് ഗതാഗത അതോറിറ്റി (RTA)യും മൂന്ന് ദിവസത്തെ സൗജന്യ പാർക്കിങ് പ്രഖ്യാപിച്ചിരുന്നു. എന്നാൽ ബഹുനില പാർക്കിങ് കേന്ദ്രങ്ങളും അൽ ഖൈൽ ഗേറ്റ് എൻ-365 പാർക്കിങ് സോണും ഈ സൗജന്യത്തിൽ ഉൾപ്പെടില്ലെന്ന് വ്യക്തമാക്കിയിരുന്നു. ഡിസംബർ 3 മുതൽ ദുബൈയിലും സാധാരണ ഫീസ് പ്രാബല്യത്തിലാകും.