ഈദുൽ ഫിത്തർ 2026: പൊതു അവധി ദിവസങ്ങളിൽ യു എ ഇയിൽ ജോലി ചെയ്യേണ്ടി വന്നാൽ നിയമപരമായ നഷ്ടപരിഹാരം എന്താണ്? അത് ലഭിക്കുന്നത് എങ്ങനെ?

ദുബൈ: ഈ മാസം ആദ്യം, ഈദുൽ ഫിത്തർ പ്രമാണിച്ച് ഫെഡറൽ ഗവൺമെന്റ് ജീവനക്കാരുടെ പൊതു അവധി മാർച്ച് 19 വ്യാഴാഴ്ച മുതൽ മാർച്ച് 22 ഞായറാഴ്ച വരെ ആയിരിക്കുമെന്ന് പ്രഖ്യാപിച്ചിരുന്നു. മാർച്ച് 23 തിങ്കളാഴ്ച ജോലി പുനരാരംഭിക്കുമെന്നും ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്‌സസും ഹ്യൂമൻ റിസോഴ്‌സസ് ആൻഡ് എമിറേറ്റൈസേഷൻ മന്ത്രാലയവും വ്യക്തമാക്കിയിരുന്നു. സ്വകാര്യമേഖലയിലും ഈദ് ദിനവുമായി ബന്ധപ്പെട്ട് അവധി പ്രഖ്യാപിച്ചിരുന്നു.

എന്നാൽ, ചില ജോലികളിൽ അവധി ദിവസങ്ങളിലും ജോലി ചെയ്യേണ്ടതായിട്ടുണ്ട്. അതുകൊണ്ട് തന്നെ അവധി ദിവസം ജോലി ചെയ്താൽ ജീവനക്കാർക്കും തൊഴിലാളികൾക്കും അതിനു പകരം നഷ്ടപരിഹാരം നൽകേണ്ടതുണ്ട്.

ഈദുൽ ഫിത്തർ ഉൾപ്പടെയുള്ള പൊതു അവധി ദിവസങ്ങളിൽ ജോലി ചെയ്യേണ്ടി വന്നാൽ എന്താണ് തൊഴിലാളികൾക്കും ജീവനക്കാർക്കും പകരം ലഭിക്കുക. ഇത് എങ്ങനെ ലഭിക്കും. നഷ്ടപരിഹാരം ലഭിച്ചില്ലെങ്കിൽ എന്തു ചെയ്യാനാകും?

ഈദ് സമയത്ത് ജോലി ചെയ്താൽ അധിക വേതനം ലഭിക്കാൻ നിങ്ങൾക്ക് അർഹതയുണ്ടോ?

സ്വകാര്യ മേഖലയിലെ യുഎഇ തൊഴിലാളികൾക്ക് 2021 ലെ ഫെഡറൽ ഡിക്രി-ലോ നമ്പർ 33 പ്രകാരം അവധി ദിനത്തിൽ തൊഴിൽ ചെയ്യുന്നതിനുള്ള നഷ്ടപരിഹാരം നൽകുന്നതിനെ കുറിച്ച് വ്യക്തമാക്കുന്നു. ഇത് രാജ്യത്തെ തൊഴിൽ ബന്ധങ്ങളെ നിയന്ത്രിക്കുന്ന പ്രാഥമിക നിയമനിർമ്മാണമാണ്. ഈ നിയമത്തിലെ ആർട്ടിക്കിൾ 28 പൊതു അവധി അവകാശങ്ങളെ കുറിച്ച് വിശദീകരിക്കുന്നുണ്ട്.

അവധി ദിനത്തിൽ ജോലി ചെയ്യുന്നവർക്ക് നഷ്ടപരിഹാരം നൽകുന്നതിന് രണ്ട് രീതികളാണ് ഉള്ളത്

ആർട്ടിക്കിൾ 28 പ്രകാരം, നിങ്ങൾ ജോലി ചെയ്യേണ്ടിവരുന്ന ഓരോ പൊതു അവധി ദിവസത്തിനും നിങ്ങളുടെ തൊഴിലുടമ ഇനിപ്പറയുന്ന രീതികളിൽ ഏതെങ്കിലും ഒരു രീതിയിലൂടെ നഷ്ടപരിഹാരം നൽകണം

നഷ്ടപരിഹാര അവധി ദിനം - നിങ്ങൾ ജോലി ചെയ്യുന്ന ഓരോ പൊതു അവധി ദിവസത്തിനും പകരം ഒരു വിശ്രമ ദിനം നിങ്ങളുടെ തൊഴിലുടമ അനുവദിക്കണം. നിങ്ങളുടെ പതിവ് വാർഷിക അവധിക്കുള്ള അർഹതയ്ക്ക് പുറമേയാണിത്.

മെച്ചപ്പെട്ട അവധിദിന തൊഴിൽ വേതനം - ജോലി ചെയ്ത ദിവസത്തിന് നിങ്ങൾക്ക് മുഴുവൻ സാധാരണ ദിവസ വേതനവും, കൂടാതെ നിങ്ങളുടെ അടിസ്ഥാന ശമ്പളത്തിന്റെ കുറഞ്ഞത് 50 ശതമാനമെങ്കിലും കൂടുതലും നൽകണം. നിങ്ങളുടെ കരാർ കൂടുതൽ തുക വ്യവസ്ഥ ചെയ്തിട്ടുണ്ടാകാം.എങ്കിൽ അത് ലഭിക്കാവുന്നതാണ്.

നഷ്ടപരിഹാരം ആർക്ക് തീരുമാനിക്കാം

ഏത് രീതിയിലുള്ള നഷ്ടപരിഹാരമാണ് തൊഴിലാളിക്ക് നൽകേണ്ടത് എന്ന് തീരുമാനിക്കേണ്ടത് സാധാരണയായി തൊഴിലുടമയാണ്, എന്നാൽ രണ്ട് രീതികളിലും നിയമം അനുശാസിക്കുന്ന ഏറ്റവും മിനിമം മാനദണ്ഡം പാലിക്കണം.

പൊതു അവധി ദിവസങ്ങളിൽ തൊഴിലാളിക്ക് പൂർണ്ണ ശമ്പളത്തോടുകൂടിയ ഔദ്യോഗിക അവധി ദിവസങ്ങൾക്ക് അർഹതയുണ്ടായിരിക്കും. തൊഴിൽ സാഹചര്യങ്ങൾ പ്രകാരം തൊഴിലാളി ഏതെങ്കിലും പൊതു അവധി ദിവസങ്ങളിൽ ജോലി ചെയ്യണമെന്ന് ആവശ്യപ്പെടുകയാണെങ്കിൽ, തൊഴിലുടമ അയാൾക്ക് ഓരോ ദിവസത്തിനും മറ്റൊരു അവധി ദിവസം നൽകണം, അല്ലെങ്കിൽ ആ ദിവസത്തെ വേതനവും ആ ദിവസത്തെ അടിസ്ഥാന വേതനത്തിന്റെ 50 ശതമാനത്തിൽ കുറയാത്ത വർദ്ധനവും നൽകണം എന്നാണ് 2021 ലെ ഫെഡറൽ ഡിക്രി-ലോ നമ്പർ 33 - ആർട്ടിക്കിൾ 28 വ്യക്തമാക്കിയിട്ടുള്ളത്.

നിങ്ങൾക്ക് ശരിയായ നഷ്ടപരിഹാരം ലഭിച്ചില്ലെങ്കിൽ എന്തുചെയ്യാം?

പൊതുഅവധി ദിനത്തിൽ ജോലി ചെയ്യാൻ നിർബന്ധിതരായിരുന്നെങ്കിലും പകരം അവധി ദിവസമോ നിയമപരമായി ആവശ്യമായ അധിക വേതനമോ ലഭിച്ചില്ലെങ്കിൽ, ആദ്യം തൊഴിലുടമയ്ക്ക് മുന്നിൽ പ്രശ്നം ഉന്നയിക്കാവുന്നതാണ്.

അവിടെ പ്രശ്നം പരിഹരിക്കപ്പെട്ടില്ലെങ്കിൽ, യുഎഇയിലെ സ്വകാര്യ മേഖലയിലെ തൊഴിൽ തർക്കങ്ങൾ കൈകാര്യം ചെയ്യുന്ന മാനവ വിഭവശേഷി, സ്വദേശിവൽക്കരണ മന്ത്രാലയത്തിൽ (MoHRE) നിങ്ങൾക്ക് പരാതി നൽകാം.

മന്ത്രാലയം പരാതി അവലോകനം ചെയ്യുകയും ജീവനക്കാരനും തൊഴിലുടമയും തമ്മിലുള്ള മധ്യസ്ഥതയ്ക്ക് ശ്രമിച്ച് പ്രശ്നപരിഹാരം കണ്ടെത്തും.