സൈനീക അഭ്യാസം; കടലിൽ പോകുന്നവർ ജാഗ്രത പാലിക്കണമെന്ന് കുവൈത്ത്

കുവൈത്ത് സിറ്റി: രാജ്യത്ത് വിവിധ സേന വിഭാഗങ്ങൾ സംയുക്ത അഭ്യാസം നടത്താൻ ഒരുങ്ങുന്നു. നവംബർ 24, 25 ദിവസങ്ങളിൽ രാവിലെ 7 മുതൽ വൈകുന്നേരം 6 വരെയാണ് അഭ്യാസ പ്രകടനങ്ങൾ നടക്കുന്നത്. വ്യോമ- നാവികസേനകൾ സംയുക്തമായി സമുദ്രങ്ങൾ കേന്ദ്രികരിച്ചാണ് പ്രവർത്തനങ്ങൾ നടത്തുന്നതെന്ന് അധികൃതർ വ്യക്തമാക്കി.

ലൈവ് ഫയർ പോലെയുള്ള അഭ്യാസങ്ങൽ നടക്കുന്നതിനാൽ പൊതുജനങ്ങൾ ജാഗ്രത പാലിക്കണമെന്ന് കുവൈത്ത് കരസേനയുടെ മോറൽ ഗൈഡൻസ് ആൻഡ് പബ്ലിക് റിലേഷൻസ് ഡയറക്ടറേറ്റ് അറിയിച്ചു. റാസ് അൽ-ജുലൈയയിൽ നിന്ന് ഖറുഹ് ദ്വീപിലേക്കുള്ള കിഴക്കൻ മേഖലയും റാസ് അൽ-സൂർ മുതൽ ഉമ്മുൽ-മറാഡിം ദ്വീപിലേക്കുള്ള കിഴക്കൻ മേഖലയിലുമാണ് സേനകളുടെ അഭ്യാസ പ്രകടനങ്ങൾ നടക്കുന്നത്.

നിശ്ചിയിച്ച ദിവസങ്ങളിൽ സമുദ്രപരിധിയിൽ വെടിവെപ്പ് പരിശീലന അഭ്യാസങ്ങൾ നടത്തുമെന്ന് സൈന്യവും വ്യക്തമാക്കി. ഈ സമയങ്ങളിൽ മത്സ്യതൊഴിലാളികളും കടലിൽ യാത്ര ചെയ്യുന്ന പൗരന്മാരും പ്രവാസികളും പ്രത്യേകം ശ്രദ്ധ പുലർത്തണം. പരമാവധി ഈ പ്രദേശം ഒഴിവാക്കി യാത്ര ചെയ്യണമെന്നും അധികൃതർ അഭ്യർത്ഥിച്ചു.