ദുബൈ: ഇത്തിഹാദ് റെയില്‍ യാത്രക്കാര്‍ക്ക് ഇനി ദുബൈ മെട്രോയിലേക്ക് നേരിട്ട് നടന്നെത്താം. അല്‍ യലായിസ് റെയില്‍വേ സ്റ്റേഷനെയും ജുമൈറ ഗോള്‍ഫ് എസ്റ്റേറ്റ്‌സ് മെട്രോ സ്റ്റേഷനെയും ബന്ധിപ്പിക്കുന്ന പുതിയ കാല്‍നടപ്പാലം യാത്രക്കാര്‍ക്കായി തുറന്നു. ഏകദേശം 400 മീറ്റര്‍ നീളമുള്ള ഈ കാല്‍നട പാതയാണ് തുറന്നത്.
അവസാനവട്ട മിനുക്കുപണികള്‍ കൂടി നടക്കുന്നുണ്ടെങ്കിലും പാലത്തിലൂടെ നടക്കാം. ഇതോടെ അഞ്ച് മിനിറ്റിനുള്ളില്‍ കാല്‍നടയായി രണ്ട് സ്റ്റേഷനുകള്‍ക്കിടയില്‍ സഞ്ചരിക്കാം. ഇതിനായി ടാക്‌സിയോ മറ്റ് വാഹനങ്ങളോ ആശ്രയിക്കേണ്ടതില്ല. ലഗേജുകളുമായി വരുന്ന യാത്രക്കാര്‍ക്ക് എളുപ്പത്തില്‍ സഞ്ചരിക്കാനായി, ഈ അടച്ചിട്ട നടപ്പാതയില്‍ ട്രാവലേറ്ററുകള്‍ സജ്ജീകരിച്ചിട്ടുണ്ട്. എലിവേറ്റഡ് ബ്രിഡ്ജിലേക്ക് എത്താന്‍ എസ്‌കലേറ്ററുകളും പടികളും ലഭ്യമാണ്.
യാത്രക്കാര്‍ക്ക് ഇത്തിഹാദ് റെയില്‍ സ്റ്റേഷനും മെട്രോ സ്റ്റേഷനും ഇടയില്‍ സര്‍വീസ് നടത്തുന്ന ഷട്ടില്‍ ബസുകളും ഉപയോഗിക്കാം. നിലവില്‍ ഈ ഷട്ടില്‍ സര്‍വീസ് സൗജന്യമാണ്, യാത്രയ്ക്ക് രണ്ട് മിനിറ്റില്‍ താഴെ സമയം മാത്രമേ എടുക്കൂ. പൊതുഗതാഗതത്തെ ആശ്രയിക്കുന്ന യാത്രക്കാര്‍ക്ക്, പ്രത്യേകിച്ച് ഇത്തിഹാദ് റെയിലിന്റെ ഈ പുതിയ പാത ഒരു പ്രധാന നേട്ടമാണ്.
ജുമൈറ ഗോള്‍ഫ് എസ്റ്റേറ്റ്‌സ് മെട്രോ സ്റ്റേഷന്‍ റെഡ് ലൈനില്‍ സ്ഥിതി ചെയ്യുന്നതിനാല്‍, ഇത്തിഹാദ് റെയില്‍ വഴി ദുബൈയില്‍ എത്തുന്ന യാത്രക്കാര്‍ക്ക് കാറുകളെ ആശ്രയിക്കാതെ തന്നെ ദുബൈ മറീന, ബിസിനസ് ബേ, ഡൗണ്‍ടൗണ്‍ ദുബൈ തുടങ്ങിയ സ്ഥലങ്ങളിലേക്ക് യാത്ര തുടരാം. ദുബൈയിലെ മറ്റ് ഭാഗങ്ങളില്‍ നിന്ന് വരുന്നവര്‍ക്ക് മെട്രോയില്‍ വന്ന്, അല്‍ യലായിസ് സ്റ്റേഷനിലേക്ക് നടന്ന്, അവിടെ നിന്ന് എമിറേറ്റുകള്‍ക്കിടയിലുള്ള ട്രെയിനുകളില്‍ കയറാനും സാധിക്കും. ടാക്‌സികളെയോ സ്വന്തം വാഹനങ്ങളെയോ മാത്രം ആശ്രയിക്കുന്നതിന് പകരം, ട്രെയിന്‍ യാത്രയും മെട്രോ യാത്രയും സംയോജിപ്പിക്കാന്‍ ഈ സൗകര്യം യാത്രക്കാരെ സഹായിക്കുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
