വിസ കാലാവധി കഴിഞ്ഞ താമസക്കാർക്ക് യുഎഇയിൽ തിരിച്ചുവരാനുള്ള ഗ്രേസ് പിരീഡ് മാർച്ച് 31 ന് അവസാനിക്കും

ദുബൈ: കാലാവധി കഴിഞ്ഞ വിസയുള്ള താമസക്കാർക്ക് യുഎഇലേക്ക് മടങ്ങാൻ അനുവദിക്കുന്ന പ്രത്യേക ഗ്രേസ് പിരീഡ് മാർച്ച് 31 ചൊവ്വാഴ്ച അവസാനിക്കുമെന്ന് ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി) അറിയിച്ചു.

പ്രാദേശിക തടസ്സങ്ങളും വ്യോമാതിർത്തി അടച്ചിടലുകളും കാരണം യുഎഇയിലേക്ക് തിരികെ യാത്ര ചെയ്യാൻ കഴിയാത്തവിധം വിദേശത്ത് കുടുങ്ങിപ്പോയ താമസക്കാരുടെ തിരിച്ചുവരവ് സുഗമമാക്കുന്നതിനാണ് ഈ കാലയളവ് നൽകിയിരുന്നത്.

ഈ പദ്ധതി പ്രകാരം, പുതിയ എൻട്രി വിസ എടുക്കാതെ തന്നെ യോഗ്യതയുള്ള താമസക്കാർക്ക് വീണ്ടും രാജ്യത്തേക്ക് പ്രവേശിക്കാൻ അനുവാദമുണ്ട്. യുഎഇക്ക് പുറത്തായിരിക്കുമ്പോൾ താമസാനുമതി കാലാവധി കഴിഞ്ഞവർക്ക്, പ്രത്യേകിച്ച് ഫെബ്രുവരി 28 മുതൽ യാത്രാ തടസ്സങ്ങൾ രൂക്ഷമായപ്പോൾ, ഈ നടപടി ബാധകമായിരുന്നു. ഒരു മാസമാണ് ഇതിനായുള്ള കാലാവധി അനുവദിച്ചിരുന്നത്. അതാണ് നാളെ അവസാനിക്കുന്നത്.

അസാധാരണമായ സാഹചര്യങ്ങളിൽ യുഎഇയുടെ മാനുഷിക സമീപനത്തിന്റെ ഭാഗമായി, താമസക്കാർ നേരിടുന്ന വെല്ലുവിളികൾ ലഘൂകരിക്കുന്നതിനും അവരുടെ സുഗമമായ തിരിച്ചുവരവ് ഉറപ്പാക്കുന്നതിനുമാണ് താൽക്കാലിക ക്രമീകരണം ലക്ഷ്യമിട്ടതെന്ന് അധികൃതർ പറഞ്ഞു.

പദ്ധതി പ്രകാരം അർഹതയുള്ള താമസക്കാർ സമയപരിധിക്കുള്ളിൽ മടങ്ങിവരണമെന്ന് യുഎഇ അധികൃതർ വ്യക്തമാക്കി, മടങ്ങി എത്തിയ ശേഷം പുതിയ എൻട്രി വിസ നേടുന്നതിനുള്ള ആവശ്യകത ഉൾപ്പെടെ സാധാരണ പ്രവേശന നടപടിക്രമങ്ങൾ ആരംഭിക്കാവുന്നതാണ് എന്നും അധികൃതർ വ്യക്തമാക്കി.