പബ്​ജി കളിക്കാൻ പത്ത് ലക്ഷം രൂപ ചിലവിട്ടു; ശകാരിച്ചതിന് പിന്നാലെ 16കാരൻ വീടുവിട്ടിറങ്ങി 

മുംബൈ: പബ്​ജി കളിക്കാനായി 16കാരൻ അമ്മയുടെ അക്കൗണ്ടിൽ നിന്ന് ചിലവിട്ടത് പത്ത് ലക്ഷം രൂപ. സംഭവമറിഞ്ഞ് മാതാപിതാക്കൾ ശകാരിച്ചതിന് പിന്നാലെ  വീടുവിട്ടിറങ്ങിയ കുട്ടിയെ ഒടുവിൽ പൊലീസ് കണ്ടെത്തി തിരികെയെത്തിച്ചു. മുംബൈയിലെ ജോഗേശ്വരിയിലാണ്​ സംഭവം. 

ഗെയിം കളിക്കാൻ ഐഡിയും വെർച്വൽ കറൻസിയും ലഭിക്കാനാണ്​ ഓൺലൈൻ ഇടപാടുകളിലൂടെ ബാങ്ക് അക്കൗണ്ടിൽനിന്ന് 10 ലക്ഷം രൂപ ചിലവഴിച്ചത്​. മകനെ കാണാനില്ലെന്ന്​ കുട്ടിയുടെ‌ അച്ഛൻ നൽകിയ പരാതിയിലാണ് പൊലീസ് അന്വേഷണം ആരംഭിച്ചത്. കഴിഞ്ഞ മാസം മുതൽ മകൻ പബ്​ജി ഗെയിമിന്​ അടിമയാണെന്ന് മാതാപിതാക്കൾ പൊലീസിനെ അറിയിച്ചു. പണം ചിലവിട്ടതിന് വഴക്കുപറഞ്ഞതിനാൽ കത്ത് എഴുതിവെച്ചാണ്​ കുട്ടി വീടുവിട്ടിറങ്ങിയത്​. 

അന്ധേരിയിലെ മഹാകാളി ഗുഹ പ്രദേശത്ത് നിന്നാണ് കുട്ടിയെ കണ്ടെത്തിയത്. കുട്ടിയെ കൗൺസിലിങ്ങിന്​ ശേഷമാണ്​ മാതാപിതാക്കളോടൊപ്പം വിട്ടത്​.