ഭോപ്പാല്‍: ബിജെപി നേതാവും രാജ്യസഭാ എംപിയുമായി ജ്യോതിരാദിത്യ സിന്ധ്യയുടെ കൊട്ടാരത്തില്‍ കള്ളന്‍ കയറി. ഗ്വാളിയോര്‍ രാജ കുടുംബാംഗമായ ജോതിരാദിത്യ സിന്ധ്യയുടെ ജയ് വിലാസ് പാലസിലാണ് മോഷണ ശ്രമം.
ജയ് വിലാസ് പാലസിലെ റാണി മഹലിലാണ് മോഷണം ശ്രമം നടന്നതെന്ന് പൊലീസ് വ്യക്തമാക്കി. തിങ്കളാഴ്ചയോ ചൊവ്വാഴ്ചയോ ആകാം കള്ളന്‍മാര്‍ അകത്തു കടന്നത് എന്നാണ് പൊലീസ് നിഗമനം. വിരലടയാളം, മറ്റ് തെളിവുകള്‍ എന്നിവയ്ക്കായി പൊലീസും ഫോറന്‍സിക് സംഘങ്ങളും സംഭവ സ്ഥലത്ത് വിശദമായ പരിശോധന നടത്തി. പൊലീസ് നായയെ കൊണ്ടും പരിശോധന നടത്തുന്നുണ്ട്.
അതേസമയം മോഷ്ടിച്ചതെന്താണെന്നും എത്ര മോഷ്ടാക്കളാണ് അകത്ത് കടന്നത് എന്നും പൊലീസ് ഇതുവരെ കണ്ടെത്തിയിട്ടില്ല. മോഷ്ടാക്കള്‍ പാലസിലെ ഒരു മുറിയുടെ വെന്റിലേറ്റര്‍ വഴിയാണ് അകത്ത് കടന്നിരിക്കുന്നതെന്ന് ഗ്വാളിയോര്‍ സിറ്റി പൊലീസ് സൂപ്രണ്ട് രത്‌നേഷ് തോമര്‍ പറഞ്ഞു. മുറിയിലെ വസ്തുവകകള്‍ക്ക് കേടുപാടുകള്‍ വരുത്തിയതായി പരിശോധനയില്‍ പൊലീസ് കണ്ടെത്തിയിട്ടുണ്ട്. കൊട്ടാരത്തിലെ ജീവനക്കാരെ ചോദ്യം ചെയ്യുമെന്ന് പൊലീസ് വ്യക്തമാക്കി.
1874ല്‍ ഗ്വാളിയോറിലെ മഹാരാജാവായിരുന്ന ജയജിറാവു സിന്ധ്യ സ്ഥാപിച്ച 19ാം നൂറ്റാണ്ടിലെ കൊട്ടാരമാണ് ജയ് വിലാസ് മഹല്‍. നിലവില്‍ ജ്യോതിരാദിത്യ സിന്ധ്യയുടെ ഉടമസ്ഥതയിലാണ് കൊട്ടരമുള്ളത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
