ട്രെയിൻ ടിക്കറ്റ് റദ്ദാക്കാൻ 300 രൂപ വാങ്ങി; കടയുടമയെ സഹോദരങ്ങൾ കാർ കയറ്റി കൊന്നു 

നോയിഡ: ട്രെയിൻ ടിക്കറ്റ് റദ്ദാക്കാൻ 300 രൂപ ഈടാക്കിയതിനെ ചൊല്ലിയുണ്ടായ തർക്ക​ത്തിനൊടുവിൽ കടയുടമയെ സഹോദരങ്ങൾ കൊലപ്പെടു​ത്തി. ഉത്തർപ്രദേശിലെ ഗ്രേറ്റർ നോയിഡയിലെ ഇക്കോടെക്​ പ്രദേശത്ത്​ കട നടത്തിയിരുന്ന നിതിൻ ശർമയുടെ മേൽ കാർ ഓടിച്ച്​ കയറ്റി കൊലപ്പെടുത്തുകയായിരുന്നു. ഗർബാര ഗ്രാമത്തിലെ നകുൽ സിങ്ങും സഹോദരൻ അരുൺ സിങ്ങുമാണ്​ കൊലപാതകം നടത്തിയത്​.

അരുണും നകുലും ചേർന്ന് ജമ്മുവിലേക്ക്​ ട്രെയിൻ ടിക്കറ്റ്​ ബുക്ക്​ ചെയ്​തിരുന്നു. എന്നാലിവർ ഞായറാഴ്ച ടിക്കറ്റ്​ റദ്ദാക്കാനായി കടയിലെത്തി. ട്രെയിൻ ടിക്കറ്റ്​ കാൻസൽ ചെയ്യുന്നതിനായി നിതിൻ ഇരുവരിൽനിന്നും 300 ഈടാക്കി. ഇതേ തുടർന്നുണ്ടായ തർക്കമാണ്​ കൊലപാതകത്തിൽ കലാശിച്ചത്. 

നിതിൻറെ ദേഹത്തേക്ക്​ ഇവർ കാർ മനപൂർവ്വം ഇടിച്ചുകയറ്റുകയായിരുന്നെന്നും രണ്ടു മൂന്നുതവണ കാർ പിറകോ​ട്ടെടുത്ത്​ ദേഹത്തേക്ക്​ കയറ്റിയെന്നുമാണ് ദൃക്സാക്ഷികൾ പറഞ്ഞത്. ഗുരുതരമായി പരിക്കേറ്റ നിതിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പ്രതികൾക്കെതിരെ കൊലപാതക കുറ്റം ചുമത്തി കേസെടുത്തതായി ഗ്രേറ്റർ നോയി അഡീഷനൽ ഡെപ്യൂട്ടി കമീഷണർ വിശാൽ പാണ്ഡെ അറിയിച്ചു. ഇവരിൽ ഒരാൾ അറസ്റ്റിലായിട്ടുണ്ട്.