'ടെലഗ്രാം രാജ്യത്തെ പുതിയ ഡാർക്ക് വെബ്ബ്, കുറ്റവാളികളുടെ സുരക്ഷിത താവളം'; കേന്ദ്ര സർക്കാർ

ന്യൂഡൽഹി: ജനപ്രിയ ഇൻസ്റ്റന്റ് മെസ്സേജിങ് പ്ലാറ്റ്‌ഫോമായ ടെലഗ്രാം രാജ്യത്ത് കുറ്റവാളികളെ തമ്മിൽ ബന്ധിപ്പിക്കുന്ന പുതിയ ഡാർക്ക് വെബ്ബ് ആയി മാറുകയാണെന്ന് കേന്ദ്ര സർക്കാർ ഡൽഹി ഹൈക്കോടതിയെ ബോധിപ്പിച്ചു. വരാനിരിക്കുന്ന നീറ്റ്-യുജി പുനപ്പരീക്ഷയ്ക്ക് മുന്നോടിയായി ജൂൺ 22 വരെ ടെലഗ്രാം പ്രവർത്തനങ്ങൾ ഇന്ത്യയിൽ താല്കാലികമായി നിരോധിച്ച കേന്ദ്ര സർക്കാർ തീരുമാനത്തെ ചോദ്യം ചെയ്ത് കമ്പനി നൽകിയ ഹർജിക്കെതിരെ സമർപ്പിച്ച കൗണ്ടർ സത്യവാങ്മൂലത്തിലാണ് കേന്ദ്രം നിലപാട് വ്യക്തമാക്കിയത്.

ക്രിമിനലുകൾ അതീവ വേഗതയിൽ ടെലഗ്രാം ചാനലുകൾ വഴി ഡീപ്പ് വെബ് ലിങ്കുകൾ പ്രചരിപ്പിക്കുകയാണെന്നും ഇത് കുറ്റവാളികളെ കണ്ടെത്താൻ അന്വേഷണ ഏജൻസികൾക്ക് തടസ്സം സൃഷ്ടിക്കുന്നുണ്ടെന്നും ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം സമർപ്പിച്ച സത്യവാങ്മൂലത്തിൽ പറയുന്നു. കഴിഞ്ഞ മെയ് മാസത്തിൽ നടന്ന നീറ്റ് പരീക്ഷയുടെ ചോദ്യപേപ്പർ ചോർച്ചയ്ക്ക് പിന്നിൽ പ്രവർത്തിച്ച സംഘടിത മാഫിയകൾ ടെലഗ്രാം വ്യാപകമായി ദുരുപയോഗം ചെയ്തതായി കണ്ടെത്തിയിരുന്നു. ഇതിനെ തുടർന്നാണ് ഐ.ടി ആക്ട് 2000-ലെ സെക്ഷൻ 69എ പ്രകാരം പ്ലാറ്റ്‌ഫോമിന് താല്കാലിക നിയന്ത്രണം ഏർപ്പെടുത്തിയത്. കൂടാതെ, പരീക്ഷാ തട്ടിപ്പുകൾ തടയുന്നതിനായി ജൂൺ 30 വരെ പഴയ സന്ദേശങ്ങൾ തിരുത്താനുള്ള (Message Editing) ഫീച്ചറും തടഞ്ഞിട്ടുണ്ട്.

'നീറ്റ് മാഫിയ' ചാനലും വ്യക്തിത്വം മറയ്ക്കാനുള്ള സംവിധാനങ്ങളും

പരീക്ഷാ തട്ടിപ്പുകൾ ഏകോപിപ്പിക്കുന്നതിനും വ്യാജ ചോദ്യപേപ്പർ വിതരണം ചെയ്യുന്നതിനും സന്ദേശങ്ങളുടെ സമയക്രമത്തിൽ തിരുത്തലുകൾ വരുത്തുന്നതിനും ടെലഗ്രാം ചാനലുകൾ വ്യാപകമായി ഉപയോഗിച്ചതായി സർക്കാർ വ്യക്തമാക്കുന്നു. ഇതിന് ഉദാഹരണമായി 'നീറ്റ് മാഫിയ' എന്ന പേരിൽ പ്രവർത്തിച്ചിരുന്ന ഒരു ചാനലിനെക്കുറിച്ച് സത്യവാങ്മൂലത്തിൽ ചൂണ്ടിക്കാട്ടിയിട്ടുണ്ട്. പതിനെണ്ണായിരത്തിലധികം വരിക്കാരുണ്ടായിരുന്ന ഈ ചാനൽ വഴി ചോദ്യപേപ്പർ ചോർച്ച, മുൻകൂർ ബുക്കിങ് ക്രമീകരണങ്ങൾ, പണമിടപാടുകൾ എന്നിവ പരസ്യമായി നടന്നിരുന്നു.

ഒരേസമയം ലക്ഷക്കണക്കിന് ആളുകളിലേക്ക് നിയമവിരുദ്ധമായ വിവരങ്ങൾ എത്തിക്കാനുള്ള ടെലഗ്രാമിന്റെ സാങ്കേതിക ശേഷി അതീവ അപകടകരമാണ്. രണ്ട് ലക്ഷം പേരെ വരെ ഉൾക്കൊള്ളാൻ കഴിയുന്ന ഗ്രൂപ്പുകളും പരിധിയില്ലാത്ത ആളുകളിലേക്ക് സന്ദേശങ്ങൾ എത്തിക്കാൻ കഴിയുന്ന ചാനലുകളും ടെലഗ്രാമിന്റെ പ്രത്യേകതയാണ്. ഇതിനൊപ്പം ഫോൺ നമ്പറുകൾക്ക് പകരം ഉപയോക്തൃനാമങ്ങളും പ്രത്യേക ഓട്ടോമേറ്റഡ് ബോട്ടുകളും ഉപയോഗിക്കാൻ കഴിയുന്നത് കുറ്റവാളികൾക്ക് തങ്ങളുടെ യഥാർത്ഥ വിവരങ്ങൾ മറച്ചുവെക്കാൻ വളക്കൂറുള്ള മണ്ണൊരുക്കുന്നുവെന്നും സത്യവാങ്മൂലം വ്യക്തമാക്കുന്നു.

ജൂൺ 21-ന് നടക്കുന്ന നീറ്റ് പുനപ്പരീക്ഷ അതീവ സുതാര്യമായി നടത്താൻ സർക്കാർ പ്രതിജ്ഞാബദ്ധമാണ്. ഈ ഘട്ടത്തിൽ താല്കാലിക നിരോധനം ഏർപ്പെടുത്തിയില്ലായിരുന്നെങ്കിൽ വലിയ തോതിലുള്ള വിദ്യാർത്ഥി പ്രക്ഷോഭങ്ങൾക്കും രാജ്യത്ത് ക്രമസമാധാന തകർച്ചയ്ക്കും അത് കാരണമാകുമായിരുന്നുവെന്ന് കേന്ദ്രം കോടതിയെ ബോധിപ്പിച്ചു. അതേസമയം, തങ്ങളെ തടഞ്ഞ നടപടി ഭരണഘടനാ വിരുദ്ധമാണെന്നാണ് ടെലഗ്രാമിന്റെ വാദം. മുൻകൂട്ടി തന്നെ നിയമവിരുദ്ധമായ തൊള്ളായിരത്തിലധികം ലിങ്കുകൾ തങ്ങൾ എ.ഐ സാങ്കേതികവിദ്യ വഴിയും മറ്റു പരിശോധന വഴിയും നീക്കം ചെയ്തിട്ടുണ്ടെന്ന് കമ്പനി ഹർജിയിൽ അവകാശപ്പെടുന്നു. ജസ്റ്റിസ് തേജ് കരിയ ഉൾപ്പെട്ട ഡിവിഷൻ ബെഞ്ചാണ് കേസിൽ അന്തിമ വാദം കേൾക്കുന്നത്.