'സ്റ്റിയറിങ് വീൽ കളിപ്പാട്ടമല്ല'; 14-കാരൻ കാറോടിച്ച് 3 പേർ മരിച്ച കേസിൽ പിതാവിനെതിരായ നരഹത്യാക്കുറ്റം നിലനിൽക്കും: കർണാടക ഹൈക്കോടതി

ബെംഗളൂരു: പ്രായപൂർത്തിയാകാത്ത കുട്ടികൾക്ക് വാഹനം ഓടിക്കാൻ നൽകുന്ന മാതാപിതാക്കൾക്കെതിരെ അതിശക്തമായ താക്കീതുമായി കർണാടക ഹൈക്കോടതി. 14 വയസ്സുള്ള മകൻ കാറോടിച്ച് മൂന്നുപേരുടെ മരണത്തിനിടയാക്കിയ വാഹനാപകട കേസിൽ, പിതാവിനെ മനഃപൂർവ്വമല്ലാത്ത നരഹത്യാക്കുറ്റത്തിൽനിന്ന് വിടുതൽ ചെയ്യാൻ ഹൈക്കോടതി വിസമ്മതിച്ചു. നിയമപരമായി വാഹനം ഓടിക്കാൻ അർഹതയില്ലാത്ത കുട്ടികളുടെ കൈകളിലേക്ക് മനഃപൂർവ്വം വാഹനത്തിന്റെ താക്കോൽ നൽകുന്ന രക്ഷിതാക്കൾക്ക് പിന്നീട് ഉണ്ടാകുന്ന ക്രിമിനൽ നടപടികളിൽ നിന്നും പ്രത്യാഘാതങ്ങളിൽ നിന്നും ഒഴിഞ്ഞുമാറാനാകില്ലെന്ന് കോടതി വ്യക്തമാക്കി.

കേസിൽ പ്രതിയായ പിതാവ് സമർപ്പിച്ച വിടുതൽ ഹർജി തള്ളിക്കൊണ്ട് ജസ്റ്റിസ് എം. നാഗപ്രസന്നയുടെ സിംഗിൾ ബെഞ്ചാണ് നിർണ്ണായക നിരീക്ഷണം നടത്തിയത്. "മോട്ടോർ വാഹനത്തിന്റെ സ്റ്റിയറിങ് വീൽ എന്നത് കുട്ടികളുടെ കൈകളിലെ കളിപ്പാട്ടമല്ല, പൊതുനിരത്തുകൾ മാതാപിതാക്കളുടെ അമിത വാത്സല്യം പരീക്ഷിക്കാനുള്ള കളിസ്ഥലങ്ങളുമല്ല," എന്ന് ജസ്റ്റിസ് നാഗപ്രസന്ന വിധിന്യായത്തിൽ ഓർമ്മിപ്പിച്ചു.

പൊതുനിരത്തുകളിൽ വാഹനം ഓടിക്കാൻ നിയമപരമായി യാതൊരു അർഹതയുമില്ലാത്ത, ആവശ്യത്തിന് പരിശീലനമോ പാകതയോ ഇല്ലാത്ത ഒരു 14 വയസ്സുകാരന്റെ കൈകളിലേക്ക് ബോധപൂർവ്വം വാഹനം നൽകിയാൽ, അത് വലിയ ദുരന്തങ്ങൾക്കും ജീവഹാനിക്കും വഴിവെക്കുമെന്ന സാമാന്യബോധം രക്ഷിതാവിനുണ്ടായിരുന്നോ എന്നത് വിചാരണയുടെ തുടക്കത്തിൽത്തന്നെ തള്ളിക്കളയാനാകില്ലെന്ന് കോടതി ചൂണ്ടിക്കാട്ടി. "താക്കോൽ കൈമാറുകയും നിരന്തരം വാഹനം ഓടിക്കാൻ മകനെ അനുവദിക്കുകയും ചെയ്ത നടപടിയിലൂടെയാണ് കുറ്റകരമായ അറിവ് വ്യക്തമാകുന്നത്. ഇത് കടുത്ത അശ്രദ്ധ എന്നതിനപ്പുറം മനഃപൂർവ്വമല്ലാത്ത നരഹത്യയായി മാറുന്നുണ്ടോ എന്നത് വിചാരണവേളയിൽ തെളിവുകളുടെ അടിസ്ഥാനത്തിലാണ് പരിശോധിക്കേണ്ടത്," കോടതി വ്യക്തമാക്കി.

പ്രായപൂർത്തിയാകാത്തവർ വാഹനം ഓടിക്കുന്നത് നിരോധിച്ചിരിക്കുന്നത് ഒരു വെറും ചട്ടപ്പടിയായ കാര്യമല്ല. നിയമപരമായി യോഗ്യതയില്ലാത്തവരുടെ കൈകളിൽ എത്തുമ്പോൾ മോട്ടോർ വാഹനം വലിയൊരു വിപത്തായി മാറും എന്നതിനാലാണ് ഈ നിയമം നിലനിൽക്കുന്നത്. ഈ നിയമപരമായ വിലക്കിനെ കേവലം സൗകര്യമായി മാത്രം കാണുന്ന മാതാപിതാക്കൾക്ക്, തങ്ങൾ വരുത്തിവെച്ച അശ്രദ്ധ മൂലം നിരപരാധികളുടെ ജീവനറ്റുപോകുമ്പോൾ ക്രിമിനൽ ശിക്ഷയിൽ നിന്ന് പൂർണ്ണ സംരക്ഷണം ലഭിക്കുമെന്ന് കരുതാനാകില്ല.

"മാതാപിതാക്കളുടെ കടമ എന്നത് സ്നേഹത്തിലും അധികാരത്തിലും മാത്രം ഒതുങ്ങുന്നതല്ല, അതിനൊപ്പം വലിയ സാമൂഹിക ഉത്തരവാദിത്തം കൂടിയുണ്ട്. പൊതുനിരത്തുകൾ എല്ലാവരും ഒത്തുചേർന്ന് ഉപയോഗിക്കുന്ന ഇടങ്ങളാണ്; അല്ലാതെ നിയമവിരുദ്ധമായ ഇത്തരം അരുതായ്മകൾ പ്രോത്സാഹിപ്പിക്കാനുള്ള പരിശീലനക്കളങ്ങളല്ല," കോടതി വിധിന്യായത്തിൽ വ്യക്തമാക്കി. കുട്ടികൾക്ക് അനധികൃതമായി വാഹനം നൽകുന്ന രക്ഷിതാക്കൾക്കെതിരെ രാജ്യവ്യാപകമായി നിയമനടപടികൾ കർശനമാക്കുന്ന സാഹചര്യത്തിലാണ് കർണാടക ഹൈക്കോടതിയുടെ ഈ സുപ്രധാന വിധി.