ചണ്ഡിഗഡ്: നൂഹിലുണ്ടായ സംഘര്‍ഷവുമായി ബന്ധപ്പെട്ട് കോണ്‍ഗ്രസ് എംഎല്‍എ മമ്മന്‍ ഖാന്‍ അറസ്റ്റില്‍. ഇന്ന് പൂലര്‍ച്ചെയാണ് പ്രത്യേക അന്വേഷണ സംഘം എംഎല്‍എയെ അറസ്റ്റ് ചെയ്തത്. അറസ്റ്റിന് പിന്നാലെ ജില്ലയില്‍ ഇന്റര്‍നെറ്റ് സേവനങ്ങള്‍ നിര്‍ത്തിവച്ചു. വെള്ളിയാഴ്ച രാവിലെ പത്തുമണി മുതല്‍ രാത്രി 11.59 വരെയാണ് ഇന്റര്‍നെറ്റ് സേവനം നിര്‍ത്തിവച്ചത്. അടിയന്തരസാഹചര്യം കണക്കിലെടുത്താണ് ഇന്റര്‍നെറ്റ് സേവനം റദ്ദാക്കിയതെന്നാണ് ജില്ലാ ഭരണകൂടത്തിന്റെ അറിയിപ്പ്.
ജൂലൈ 31 ന് നടന്ന നുഹ് അക്രമത്തില്‍ പങ്കുണ്ടെന്ന് ആരോപിച്ചാണ് ഇന്ന് രാവിലെ മമ്മന്‍ ഖാനെ ഹരിയാന പൊലീസ് അറസ്റ്റ് ചെയ്തത്. അറസ്റ്റിന് മുന്നോടിയായി ജില്ലയില്‍ നിരോധനാജ്ഞ പ്രഖ്യാപിച്ചിരുന്നു.
ചോദ്യം ചെയ്യലിനായി ഓഗസ്റ്റ് 25ന് ഹാജരാകാന്‍ പ്രത്യേക അന്വേഷണ സംഘം എംഎല്‍എയോട് ആവശ്യപ്പെട്ടിരുന്നു. എന്നാല്‍ ആരോഗ്യപരമായ കാരണങ്ങളാല്‍ 10 ദിവസം നീട്ടി നല്‍കണമെന്ന് എംഎല്‍എ അന്വേഷണ സംഘത്തെ അറിയിച്ചു. അന്വേഷണവുമായി സഹകരിക്കാന്‍ തയാറാകാതെ വന്നതോടെയാണ് എംഎല്‍എയുടെ അറസ്റ്റ് രേഖപ്പെടുത്തിയത്. നൂഹില്‍ സംഘര്‍ഷമുണ്ടായ ജൂലൈ 31ന് തലേദിവസം മമന്‍ ഖാന്‍ പ്രദേശത്തുണ്ടായിരുന്നുവെന്നും നിരവധി പേരുമായി ഫോണില്‍ സംസാരിച്ചതായും അന്വേഷണത്തില്‍ കണ്ടെത്തിയിട്ടുണ്ട്. സംഘര്‍ഷവുമായി ബന്ധപ്പെട്ട് 52 പേരെയാണ് പ്രതി ചേര്‍ത്തിരിക്കുന്നത്. ഇതില്‍ 42 പേര്‍ അറസ്റ്റിലായി.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
