ന്യൂഡല്‍ഹി: വിമാനത്താവളങ്ങളിലെ ലഗേജ് മെഷീനുകളുടെ കൃത്യത ഉറപ്പാക്കാന്‍ രാജ്യവ്യാപകമായി ഓഡിറ്റ് നടത്തണമെന്ന് വ്യോമയാന മന്ത്രാലയം ലീഗല്‍ മെട്രോളജി വകുപ്പിന് നിര്‍ദേശം നല്‍കി. ലഗേജുകളുടെ തൂക്കം അധികമായി കാണിച്ച് യാത്രക്കാരില്‍നിന്ന് അമിത നിരക്ക് ഈടാക്കുന്നുവെന്ന ആരോപണങ്ങള്‍ക്ക് പിന്നാലെയാണ് പരിശോധന.
ലഗേജ് ഭാരം കണക്കാക്കുന്ന മെഷീനുകളില്‍ രാജ്യവ്യാപകമായി പരിശോധന നടത്തണമെന്നാവശ്യപ്പെട്ട് ബിജെപി രാജ്യസഭാംഗം അജീത് മാധവറാവു ഗോപ്ചാഡെ കാബിനറ്റ് സെക്രട്ടറി ടിവി സോമനാഥനു കത്തയച്ചതിനു പിന്നാലെയാണ് നടപടി.
മുന്‍പ് പുനെ വിമാനത്താവളത്തിലെ മെഷീനുകളില്‍ ലീഗല്‍ മെട്രോളജി വകുപ്പ് നടത്തിയ പരിശോധനയില്‍ വലിയ പിഴവുകള്‍ കണ്ടെത്തിയിരുന്നു. മെഷീനുകളുടെ ശാസ്ത്രീയമായ കാലിബ്രേഷനും കൃത്യമായ ഇടവേളകളിലുള്ള പരിശോധനയും നിര്‍ബന്ധമാക്കുമെന്നും അംഗീകൃത ലബോറട്ടറികളില്‍ നിന്നുള്ള പരിശോധന റിപ്പോര്‍ട്ട് തേടുമെന്നും മന്ത്രാലയം അറിയിച്ചു.
വിമാനത്താവളങ്ങളിലെ ലഗേജ് മെഷീനുകള്‍ പരിശോധിക്കാനും കാലിബ്രേഷന്‍ നടത്താനും സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും 2023 ഡിസംബര്‍ 19ന് കേന്ദ്ര ഉപഭോക്തൃകാര്യ മന്ത്രാലയവും നിര്‍ദേശം നല്‍കിയിരുന്നു. ഹോട്ടലില്‍നിന്ന് ഇറങ്ങുമ്പോള്‍ 15 കിലോ മാത്രം ഭാരമുണ്ടായിരുന്ന പെട്ടി വിമാനത്താവളത്തില്‍ എത്തിയപ്പോള്‍ 16.5 കിലോ ആയ സംഭവത്തിനു പിന്നാലെയായിരുന്നു ഈ നടപടി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
