'പപ്പ പ്രിയപ്പെട്ട സോണിയയെ നോക്കി അഭിമാനത്തോടെ പുഞ്ചിരിക്കുന്നത് എനിക്ക് കാണാം'; രാജീവ് ഗാന്ധിയുടെ ഓർമ്മദിനത്തിൽ രാഹുലിന്റെ ഹൃദയസ്പർശിയായ കുറിപ്പ്

ന്യൂഡൽഹി: മുൻ പ്രധാനമന്ത്രി രാജീവ് ഗാന്ധിയുടെ ജന്മവാർഷിക ദിനത്തിൽ അമ്മ സോണിയാ ഗാന്ധിയുടെ അതിജീവനത്തെയും ജീവിതയാത്രയെയും ഓർത്തെടുത്ത് ലോക്സഭാ പ്രതിപക്ഷ നേതാവ് രാഹുൽ ഗാന്ധി പങ്കുവെച്ച വൈകാരിക കുറിപ്പ് ശ്രദ്ധേയമാകുന്നു. സോണിയാ ഗാന്ധിയുടെ ജീവിതം പറയുന്ന ബിലോങിങ്: എ ജേർണി ഓഫ് ലവ് എന്ന പുസ്തകം പുറത്തിറങ്ങാനിരിക്കെയാണ് അച്ഛന്റെ ഓർമ്മകൾ നിറഞ്ഞുനിൽക്കുന്ന ദിനത്തിൽ രാഹുൽ ഹൃദയസ്പർശിയായ കുറിപ്പ് സമൂഹമാധ്യമങ്ങളിൽ പങ്കുവെച്ചത്.

"അമ്മേ, അച്ഛനും അമ്മയും ഒന്നിച്ചുണ്ടായിരുന്നത് അവസാനമായി കണ്ടിട്ട് 35 വർഷത്തിലേറെയായി. അച്ഛൻ ഞങ്ങളെ വിട്ടുപിരിഞ്ഞ ആ ദിവസം മുതൽ, ജീവിതം നിങ്ങളുടെ മുന്നിലേക്ക് എറിഞ്ഞുതന്ന ഓരോ പ്രതിസന്ധികളെയും തളരാത്ത ധൈര്യത്തോടും അന്തസ്സോടും കൂടി നിങ്ങൾ നേരിടുന്നത് ഞാൻ കണ്ടുകൊണ്ടിരിക്കുകയാണ്. അച്ഛന്റെ വിയോഗത്തിന് ശേഷം നിങ്ങളുടെ ജീവിതം എത്രത്തോളം ദുഷ്കരമായിരുന്നുവെന്നും നിങ്ങൾ എന്തൊക്കെ അനുഭവിച്ചുവെന്നും എനിക്കും പ്രിയങ്കയ്ക്കും മാത്രമേ യഥാർത്ഥത്തിൽ അറിയൂ," എന്ന് രാഹുൽ കുറിച്ചു.

സ്വകാര്യതയെ അത്രയേറെ ഇഷ്ടപ്പെടുന്ന അമ്മയെപ്പോലൊരു വ്യക്തിക്ക് സ്വന്തം ജീവിതകഥ ലോകത്തിന് മുന്നിൽ തുറന്നുപറയുന്നത് എത്രമാത്രം പ്രയാസകരമായിരുന്നെന്ന് തനിക്കറിയാമെന്ന് രാഹുൽ പറയുന്നു. ഒടുവിൽ അമ്മയെ സ്നേഹിക്കുന്ന ദശലക്ഷക്കണക്കിന് മനുഷ്യരിലേക്ക് ‘ബിലോങിങ്: എ ജേർണി ഓഫ് ലവ്’ എന്ന മനോഹരമായ ജീവിതകഥ എത്തുന്നതിൽ അതിയായ സന്തോഷവും അഭിമാനവുമുണ്ട്. അച്ഛന്റെ ഈ ജന്മദിനത്തിൽ, അദ്ദേഹം മുകളിൽ നിന്ന് തന്റെ പ്രിയപ്പെട്ട സോണിയയെ നോക്കി അഭിമാനത്തോടെ പുഞ്ചിരിക്കുന്നത് തനിക്ക് കാണാമെന്നും രാഹുൽ ഗാന്ധി ഫേസ്ബുക്കിൽ കുറിച്ചു.

സ്വകാര്യ ജീവിതത്തിലും ഇന്ത്യൻ രാഷ്ട്രീയത്തിലും വ്യക്തിമുദ്ര പതിപ്പിച്ച സോണിയാ ഗാന്ധിയുടെ അനുഭവങ്ങളും രാജീവ് ഗാന്ധിയോടൊപ്പമുള്ള സ്നേഹനിർഭരമായ ഓർമ്മകളും പങ്കുവെക്കുന്ന പുസ്തകമാണ് ഉടൻ പുറത്തിറങ്ങുന്ന ‘ബിലോങിങ്: എ ജേർണി ഓഫ് ലവ്’. നഷ്ടങ്ങളും പോരാട്ടങ്ങളും നിറഞ്ഞ ജീവിതം സോണിയ സ്വന്തം വാക്കുകളിൽ അടയാളപ്പെടുത്തുന്ന ഈ പുസ്തകം വായനാലോകം വലിയ ആകാംക്ഷയോടെയാണ് കാത്തിരിക്കുന്നത്.