'വോട്ടെണ്ണലിന്റെ ദൃശ്യങ്ങൾ കാണാനില്ല'; തെരഞ്ഞെടുപ്പ് കമ്മിഷനെ കുടഞ്ഞ് സുപ്രീം കോടതി

ന്യൂഡൽഹി: കർണാടകയിലെ ശൃംഗേരി നിയമസഭാ മണ്ഡലത്തിൽ 2023ൽ നടന്ന വോട്ടെണ്ണലിന്റെ വിഡിയോ ദൃശ്യങ്ങൾ കാണാനില്ലെന്ന തെരഞ്ഞെടുപ്പ് കമ്മീഷന്റെ വാദത്തിനെ രൂക്ഷമായി വിമർശിച്ച് സുപ്രീംകോടതി. കമ്മീഷന്റെ കയ്യിൽ രേഖകൾ ഇല്ലെങ്കിൽ പിന്നെ ആരുടെ കയ്യിൽ ഉണ്ടാകുമെന്ന് കോടതി ചോദിച്ചു. അടുത്ത തവണ ബന്ധപ്പെട്ട രേഖകളുമായി എത്തിയില്ലെങ്കിൽ ഗുരുതരമായാ നടപടികൾ നേരിടേണ്ടി വരുമെന്നും കോടതി മുന്നറിയിപ്പ് നൽകി.

ജസ്റ്റിസുമാരായ സഞ്ജയ് കുമാർ, സഞ്ജീവ് സച്ച്ദേവ എന്നിവരടങ്ങിയ ബെഞ്ചാണ് കേസ് പരിഗണിച്ചത്. തെരഞ്ഞെടുപ്പ് നടത്തുക എന്നതും അതുമായി ബന്ധപ്പെട്ട രേഖകൾ സൂക്ഷിക്കേണ്ടതും കമ്മീഷണന്റെ ഉത്തരവാദിത്വമാണെന്ന് കോടതി പറഞ്ഞു. കോൺഗ്രസ് എംഎൽഎ ടി.ഡി. രാജഗൗഡയും ബിജെപി സ്ഥാനാർഥി ഡി.എൻ. ജീവരാജും തമ്മിലുള്ള കേസ് പരിഗണിച്ചപ്പോഴാണ് കോടതി കമ്മീഷനെതിരെ വിമർശനം ഉന്നയിച്ചത്.

2023ലെ നിയമസഭാ തെരഞ്ഞെടുപ്പിൽ 201 വോട്ടിന്റെ ഭൂരിപക്ഷത്തിൽ രാജഗൗഡ വിജയിച്ചതായി പ്രഖ്യാപിച്ചിരുന്നു. പിന്നീട് നടത്തിയ വോട്ടെണ്ണലിൽ ബിജെപി സ്ഥാനാർഥി ഡി.എൻ. ജീവരാജ് ജയിച്ചതായി തെരഞ്ഞെടുപ്പ് കമ്മീഷൻ പ്രഖ്യാപിക്കുക ആയിരുന്നു. ഇതോടെയാണ് കേസുമായി രാജഗൗഡ കോടതിയെ സമീപിച്ചത്.

ആദ്യഘട്ട വോട്ടെണ്ണലിന്റെയും പിന്നീട് നടത്തിയ പുനർവോട്ടെണ്ണലിന്റെയും വിഡിയോ ദൃശ്യങ്ങളും തിരഞ്ഞെടുപ്പ് നിരീക്ഷകന്റെ റിപ്പോർട്ടും ലഭ്യമാക്കണമെന്നാണ് രാജഗൗഡയുടെ ആവശ്യം

രേഖകൾ ഹാജരാക്കാൻ സുപ്രീംകോടതി നിർദേശം നൽകാനിരിക്കെയാണ് 2023ലെ വിഡിയോ കണ്ടെത്താനായില്ലെന്ന് കമ്മീഷൻ കോടതിയെ അറിയിച്ചത്. ഇതിൽ അതൃപ്തി പ്രകടിപ്പിച്ച കോടതി, കൈവശമുള്ള എല്ലാ രേഖകളും അടുത്ത വാദത്തിനുമുമ്പ് ഹാജരാക്കാൻ കമ്മിഷനോട് നിർദേശിച്ചു. രേഖകൾ ഹാജരാക്കാത്തപക്ഷം കമ്മിഷനെതിരെ കടുത്ത നടപടി ഉണ്ടാകുമെന്നും കോടതി മുന്നറിയിപ്പ് നൽകി.