ഇനി രാത്രിയിലും താജ്മഹൽ സന്ദർശിക്കാം; ഒരു വർഷത്തിനുശേഷം രാത്രികാഴ്ചകൾക്കായി നാളെ മുതൽ പ്രവേശനം 

ന്യൂഡൽഹി: രാത്രികാഴ്ചകൾക്കായി താജ്മഹൽ നാളെ മുതൽ തുറക്കും. കോവിഡ് വ്യാപനത്തെതുടർന്ന് ഒരു വർഷത്തിലേറെയായി അടച്ചിട്ട ശേഷമാണ് നാളെ മുതൽ സന്ദർശകർക്ക് രാത്രിയിൽ താജ്മഹൽ സന്ദർശിക്കാൻ അവസരമൊരുങ്ങുന്നത്. കഴിഞ്ഞ വർഷം മാർച്ച് 17 മുതലാണ് താജ്മഹലിലെ രാത്രി സന്ദർശനത്തിന് വിലക്കേർപ്പെടുത്തിയത്. 

ഓ​ഗസ്റ്റ് 21, 23, 24 തിയതികളിൽ രാത്രിയിൽ താജ്മഹൽ സന്ദർശിക്കാമെന്ന് അധികൃതർ പറഞ്ഞു. വെള്ളിയാഴ്ച ദിവസങ്ങളിൽ താജ്മഹൽ അവധി ആയതിനാലും ഞായറാഴ്ചയിൽ ലോക്ക്ഡൗൺ നിലവുലുള്ളതുകൊണ്ടും ഈ ദിവസങ്ങളിൽ സന്ദർശകരെ അനുവദിക്കില്ല. വൈകിട്ട് 8:30 മുതൽ 9മണി വരെ, 9 മുതൽ 9:30 വരെ, 9:30 മുതൽ 10 മണി വരെ എന്നിങ്ങനെയാണ് രാത്രി സന്ദർശനത്തിന് സമയം അനുവദിച്ചിരിക്കുന്നത്. ഓരോ സമയത്തും 50 സന്ദർശകരെ വരെയാണ് അനുവദിക്കുക. സുപ്രീം കോടതി ഏർപ്പെടുത്തിയിരിക്കുന്ന നിയന്ത്രണം അനുസരിച്ചാണിത്. ടിക്കറ്റുകൾ ഒരു ദിവസം മുൻപ് ബുക്ക് ചെയ്യാമെന്നും അധികൃതർ പറഞ്ഞു.