'രാജ്യത്തിന് വേണ്ടത് ജീവശ്വാസം, പ്രധാന മന്ത്രിക്കുള്ള താമസ സൗകര്യമല്ല'

ന്യൂഡല്‍ഹി: കോവിഡ് പ്രതിരോധത്തില്‍ കേന്ദ്രസര്‍ക്കാരിന് എതിരെ രൂക്ഷ വിമര്‍ശനവുമായി കോണ്‍ഗ്രസ് നേതാവ് രാഹുല്‍ ഗാന്ധി. കോവിഡ് വ്യാപനത്തിന്റെ സാഹചര്യത്തിലും സെന്‍ട്രല്‍ വിസ്ത പ്രോജക്ട് ഉള്‍പ്പെടെ വന്‍കിട പദ്ധതികളുമായി മുന്നോട്ടുപോകുന്ന കേന്ദ്രസര്‍ക്കാര്‍ നയത്തിന് എതിരെയാണ് രാഹുലിന്റെ വിമര്‍ശനം. 

രാജ്യത്തിന് ആവശ്യം ശ്വാസമാണെന്നും പ്രധാനമന്ത്രിക്കായുള്ള താമസ സൗകര്യമല്ലെന്നും അദ്ദേഹം ട്വിറ്ററില്‍ കുറിച്ചു. ഓക്‌സിജന്‍ സിലിണ്ടറുകളുമായി ക്യൂ നില്‍ക്കുന്ന ജനങ്ങളുടെയും നിര്‍മ്മാണം പുരോഗമിക്കുന്ന സെന്‍ട്രല്‍ വിസ്ത പദ്ധതിയുടെയും ചിത്രം പങ്കുവെച്ചുകൊണ്ടായിരുന്നു രാഹുലിന്റെ വിമര്‍ശനം. 

നേരത്തെ, വന്‍കിട നിര്‍മ്മാണ പദ്ധതി നിര്‍ത്തിവയ്ക്കണമെന്ന് ആവശ്യപ്പെട്ട് രാഹുല്‍ രംഗത്തുവന്നിരുന്നു.രാജ്യത്ത് കഴിഞ്ഞ 24 മണിക്കൂറിനുള്ളില്‍ മാത്രം നാലു ലക്ഷത്തില്‍ അധികം പേര്‍ക്കാണ് കോവിഡ് സ്ഥിരീകരിച്ചത്. 4,03,738 പേര്‍ക്കാണ് കോവിഡ് ബാധിച്ചത്. 4,092 പേര്‍ ഈ സമയത്തിനിടെ കോവിഡ് മൂലം മരിച്ചു.