കോവിഡ് മാനദണ്ഡം പാലിക്കാത്തവര്‍ക്ക് ഭാവിയില്‍ വിമാനയാത്രയില്ല; യാത്രാ വിലക്ക് ഏര്‍പ്പെടുത്തുമെന്ന് കേന്ദ്രം

ന്യൂഡൽഹി: കോവിഡ് സുരക്ഷാ മാനദണ്ഡങ്ങൾ പാലിക്കാത്ത യാത്രക്കാർക്ക് വിമാനയാത്രാ വിലക്കേർപ്പെടുത്താൻ കേന്ദ്ര വ്യോമയാന മന്ത്രാലയം. സുരക്ഷാ മാനദണ്ഡങ്ങൾ പാലിക്കാത്തവരുടെ പട്ടിക തയാറാക്കി ഭാവി യാത്രകൾക്കു വിലക്കേർപ്പെടുത്തുന്നത് കേന്ദ്ര സർക്കാർ പരിഗണിക്കുകയാണ്. 

മാസ്ക് ശരിയായി ധരിക്കാത്തവർ, സുരക്ഷാ മാനദണ്ഡങ്ങൾ പാലിക്കാതെ അടുത്തിടപഴകുന്നവർ എന്നിവർക്കാണ് യാത്ര വിലക്ക് ഏർപ്പെടുത്തുക. ഏതാനും യാത്രക്കാരുടെ അശ്രദ്ധ പ്രശ്നങ്ങൾ സൃഷ്ടിക്കുകയാണ്.

സുരക്ഷാ മാനദണ്ഡങ്ങള്‍ പാലിക്കാത്തവര്‍ക്ക്‌ യാത്രാ വിലക്കേർപ്പെടുത്താനുള്ള നടപടികൾ ആരംഭിച്ചെന്ന് കേന്ദ്ര വ്യോമയാന മന്ത്രി ഹർദീപ് സിങ് പുരി പറഞ്ഞു. കോവിഡ് വ്യാപനം തടയുന്നതിന് ആവശ്യമായ നടപടികൾ സ്വീകരിക്കാൻ വ്യോമയാന ഡയറക്ടറേറ്റ് ജനറലിനു (ഡിജിസിഎ) മന്ത്രാലയം നിർദേശം നൽകിയിട്ടുണ്ട്.