കേരളത്തിലും ബംഗാളിലും നടക്കുന്നതു പോലുള്ള അക്രമം വേറെ എവിടെയെങ്കിലുമുണ്ടോ?: യോഗി ആദിത്യനാഥ് 

ലക്‌നൗ: കേരളത്തിലും ബംഗാളിലും നടക്കുന്നതു പോലുള്ള അക്രമങ്ങളും രാഷ്ട്രീയ കൊലപാതകങ്ങളും മറ്റെവിടെയെങ്കിലും നടക്കുന്നുണ്ടോയെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. യുപി ആദ്യഘട്ട വോട്ടെടുപ്പു ദിവസം കേരളത്തിനെതിരെ നടത്തിയ പരാമര്‍ശത്തില്‍ ഉറച്ചുനില്‍ക്കുന്നതായി യോഗി പറഞ്ഞു. 

'ബംഗാളില്‍ നിന്ന് വരുന്നവര്‍ ഇവിടെ അരാജകത്വം സൃഷ്ടിക്കുകയാണ്. ഇതില്‍ ജാഗ്രത പുലര്‍ത്തണമെന്നാണ് ജനങ്ങളോടു പറഞ്ഞത്. ഇവിടെ ലഭിക്കുന്ന സുരക്ഷയും അന്തസ്സും ചിലര്‍ തടസ്സപ്പെടുത്താന്‍ വന്നിരിക്കുകയാണെന്നും അതനുവദിക്കരുതെന്നും ജനങ്ങളെ അറിയിക്കേണ്ടത് അത്യാവശ്യമാണ്. അങ്ങനെ ജനങ്ങള്‍ക്ക് മുന്നറിയിപ്പ് നല്‍കേണ്ടത് എന്റെ  ഉത്തരവാദിത്വമായിരുന്നു'-വാര്‍ത്താ ഏജന്‍സിയായ എഎന്‍ഐക്ക് നല്‍കിയ അഭിമുഖത്തില്‍ യോഗി പറഞ്ഞു.

'ബംഗാളില്‍ സമാധാനപരമായിട്ടാണോ തിരഞ്ഞെടുപ്പ് നടന്നത്. അടുത്തിടെ നടന്ന വിധാന്‍സഭ തിരഞ്ഞെടുപ്പില്‍ ബിജെപി പ്രവര്‍ത്തകര്‍ അക്രമത്തിനിരയായി. ബൂത്തുകള്‍ പിടിച്ചെടുത്തു. അരാജകത്വം ഉച്ചസ്ഥായിയില്‍ എത്തി. നിരവധിപേര്‍ കൊല്ലപ്പെട്ടു. സമാനമായ അവസ്ഥയാണ് കേരളത്തിലും. ഈ രണ്ട് സംസ്ഥാനങ്ങളിലും നടന്നത് പോലുള്ള ആക്രമണങ്ങളും രാഷ്ട്രീയ കൊലപാതകങ്ങളും മറ്റേതെങ്കിലും സംസ്ഥാനങ്ങളില്‍ നടന്നിട്ടുണ്ടോ?'-യോഗി ചോദിച്ചു.

തിരഞ്ഞെടുപ്പില്‍ ബിജെപിക്ക് ജയിക്കാനായില്ലെങ്കില്‍ യുപി കേരളവും ബംഗാളും കശ്മീരും ആയി മാറാന്‍ അധിക സമയം എടുക്കില്ലെന്നും അതുകൊണ്ട് തെറ്റുപറ്റാതെ സൂക്ഷിക്കണമെന്നും യോഗി ആദ്യഘട്ട തെരഞ്ഞെടുപ്പിനു മുമ്പ് പറഞ്ഞത് രാഷ്ട്രീയവിവാദം ഉണ്ടാക്കിയിരുന്നു.