ന്യൂഡല്‍ഹി: കോവിഡ് കേസുകള്‍ ഏറ്റവുമധികം റിപ്പോര്‍ട്ട് ചെയ്ത രാജ്യങ്ങളുമായി താരതമ്യം ചെയ്യുമ്പോള്‍ ഇന്ത്യയില്‍ കൊറോണ വൈറസ് ബാധിതരുടെ എണ്ണം കുറവാണെന്ന് ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച്. ലോകത്ത് ഏറ്റവുമധികം കോവിഡ് കേസുകള്‍ റിപ്പോര്‍ട്ട് ചെയ്ത അമേരിക്കയില്‍ ശരാശരി 5.3 ആളുകളില്‍ നടത്തിയ പരിശോധനയില്‍ ഒരാള്‍ക്ക് വീതം കോവിഡ് സ്ഥിരീകരിച്ചിട്ടുണ്ട്. എന്നാല്‍ ഇന്ത്യയില്‍ 24 പരിശോധനകളില്‍ ഒരാള്‍ക്ക് മാത്രമാണ് രോഗം കണ്ടെത്തുന്നതെന്ന് ഐസിഎംആര്‍ വാര്‍ത്താസമ്മേളനത്തില്‍ വ്യക്തമാക്കി.
അമേരിക്ക, ജപ്പാന്‍, ബ്രിട്ടണ്‍, ഇറ്റലി എന്നി രാജ്യങ്ങളുമായി ഇന്ത്യയെ താരതമ്യം ചെയ്തുളള കണക്കുകളാണ് പുറത്തുവിട്ടത്. ബ്രിട്ടണില്‍ 3.4 ആളുകളില്‍ നടത്തിയ പരിശോധനയില്‍ ഒരാള്‍ക്ക് വീതം കോവിഡ് കണ്ടെത്തിയിട്ടുണ്ട്. ഇറ്റലിയില്‍ ഇത് 6.7 ആളുകളില്‍ ഒരാളാണ്. ജപ്പാനില്‍ സ്ഥിതി വ്യത്യസ്തമാണ്. 11.7 ആളുകളില്‍ നടത്തിയ പരിശോധനയില്‍ മാത്രമാണ് കൊറോണ വൈറസ് ബാധയുളള ഒരാളെ കണ്ടെത്താനായതെന്നും ഐസിഎംആര്‍ വാര്‍ത്താസമ്മേളനത്തില്‍ വ്യക്തമാക്കി.
ഇതുവരെ കോവിഡ് കണ്ടെത്താനായി 2,90,401 പരിശോധനകളാണ് നടത്തിയത്. ഇന്നലെ മാത്രം 30,043 പേരില്‍ പരിശോധന നടത്തിയതായും ഐസിഎംആര്‍ വ്യക്തമാക്കി.പൊതു, സ്വകാര്യ മേഖലകളില്‍ പ്രവര്‍ത്തിക്കുന്ന പരിശോധനാ കേന്ദ്രങ്ങളില്‍ നടത്തിയ സാമ്പിള്‍ പരിശോധനയുടെ കണക്കുകളാണ് വിശദീകരിച്ചത്.
കോവിഡ് പ്രതിരോധ പ്രവര്‍ത്തനങ്ങള്‍ക്ക് കൂടുതല്‍ കരുത്തുപകര്‍ന്ന് ചൈനയില്‍ നിന്നുളള പരിശോധന കിറ്റുകള്‍ ഇന്ന് രാജ്യത്തെത്തും. 6.5 ലക്ഷം കിറ്റുകളാണ് ചൈനയില്‍ നിന്ന് ഇന്ത്യയിലേക്ക് കയറ്റി അയച്ചത്. ഇതുള്‍പ്പെടെ 20 ലക്ഷം കിറ്റുകള്‍ ഇന്ത്യയിലേക്ക് കയറ്റി അയക്കുന്നതിനുളള നടപടികള്‍ പുരോഗമിക്കുകയാണെന്ന് ചൈനയിലുളള ഇന്ത്യന്‍ അംബാസഡര്‍ പറഞ്ഞു.
രാജ്യത്ത് കോവിഡ് പരിശോധന വര്‍ധിപ്പിക്കണമെന്നതാണ് വിവിധ കോണുകളില്‍ നിന്ന് ഉയരുന്ന മുഖ്യ ആവശ്യം. ഇത് കണക്കിലെടുത്താണ് കേന്ദ്രസര്‍ക്കാരിന്റെ നടപടി. 20 ലക്ഷം പരിശോധന കിറ്റുകള്‍ 15 ദിവസത്തിനകം ഇന്ത്യയില്‍ എത്തും. ഇതില്‍ 6.5 ലക്ഷം കിറ്റുകളാണ് ചൈന ഇന്ത്യയിലേക്ക് ഇന്ന് കയറ്റി അയച്ചത്. റാപ്പിഡ് ആന്റി ബോഡി പരിശോധനാ കിറ്റും ആര്‍എന്‍എ വേര്‍തിരിക്കുന്ന മെഡിക്കല്‍ കിറ്റുമാണ് ഇതില്‍ ഉള്‍പ്പെടുന്നത്. ചൈനയിലെ ഗ്വാങ്‌ഷോ വിമാനത്താവളത്തില്‍ നിന്നാണ് കിറ്റുകള്‍ കയറ്റി അയച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
