അമ്പലത്തില്‍ നിന്ന് കിട്ടിയ 300 രൂപ വീതംവെയ്ക്കുന്നതിനെ ചൊല്ലി തര്‍ക്കം; അയല്‍വാസികള്‍ ആണി തറച്ച വടി കൊണ്ട് അടിച്ചു, 24കാരന് ദാരുണാന്ത്യം

ലക്‌നൗ: ഉത്തര്‍പ്രദേശില്‍ 24 കാരനെ അയല്‍വാസികള്‍ സംഘം ചേര്‍ന്ന് ആക്രമിച്ച് ക്രൂരമായി കൊലപ്പെടുത്തി. 300 രൂപയെ ചൊല്ലിയുളള തര്‍ക്കമാണ് പ്രകോപനത്തിന് കാരണം. ആണി തറച്ച വടികള്‍ കൊണ്ടുളള പ്രഹരമേറ്റ് ഗുരുതരമായി പരിക്കേറ്റ യുവാവ് ആശുപത്രിയിലേക്ക് കൊണ്ടുപോകും വഴിയാണ് മരിച്ചതെന്ന് പൊലീസ് പറയുന്നു. 24കാരനായ ദീപക്കാണ് ആക്രമണത്തിന് ഇരയായത്.

ഉത്തര്‍പ്രദേശ് ബിജ്‌നോര്‍ ഗാഞ്ച് മേഖലയില്‍ തിങ്കളാഴ്ചയാണ് സംഭവം. മദ്യലഹരിയിലാണ് ഈ ക്രൂര കൃത്യം ചെയ്തതെന്ന് പൊലീസ് പറയുന്നു. സംഭവത്തില്‍ അയല്‍വാസികളായ മൂന്ന് പേരില്‍ ഒരാളെ പിടികൂടി. ഒളിവില്‍ കഴിയുന്ന മറ്റു രണ്ടുപേര്‍ക്കുളള തെരച്ചില്‍ തുടരുന്നതായി പൊലീസ് പറയുന്നു.

അമ്പലത്തില്‍ നിന്ന് ലഭിച്ച 300 രൂപയെ ചൊല്ലിയുളള തര്‍ക്കമാണ് ആക്രമണത്തില്‍ കലാശിച്ചത്. ദീപക്കിന്റെ കൈവശമായിരുന്നു പണം. ഇത് വീതം വെയ്ക്കുന്നതിനെ ചൊല്ലി തര്‍ക്കം ഉടലെടുക്കുകയായിരുന്നു. തുടര്‍ന്ന് അയല്‍വാസികള്‍ മൂന്ന് പേര്‍ ചേര്‍ന്ന് ദീപക്കിനെ ആക്രമിക്കുകയായിരുന്നുവെന്ന് പൊലീസ് പറയുന്നു. ആണി് തറച്ച വടികള്‍ കൊണ്ട് മാരകമായി പരിക്കേല്‍പ്പിക്കുകയായിരുന്നു.

വിവരം അറിഞ്ഞ് സ്ഥലത്തെത്തിയ ദീപക്കിന്റെ ബന്ധുക്കളാണ് ആശുപത്രിയിലേക്ക് കൊണ്ടുപോയത്. അതിനിടെ പ്രതികള്‍ പ്രദേശത്ത് നിന്ന് കളന്നുകളഞ്ഞു. നെഞ്ചിലേറ്റ ഗുരുതര പരിക്കാണ് മരണ കാരണമെന്ന് പൊലീസ് പറയുന്നു.