'ആ പ്രതിജ്ഞ പാലിച്ചു'; 370നെതിരെ മോദി സമരം ചെയ്യുന്ന ചിത്രം പങ്കുവെച്ച് രാം മാധവ്, ഏറ്റെടുത്ത് സോഷ്യല്‍മീഡിയ 

ന്യൂഡല്‍ഹി: ജമ്മുകശ്മീരിന് പ്രത്യേക പദവി നല്‍കുന്ന ഭരണഘടനയുടെ 370-ാം അനുച്ഛേദം  റദ്ദാക്കിയത് ഇന്നലെയായിരുന്നു. ഇതിന് പിന്നാലെ പ്രധാനമന്ത്രി നരേന്ദ്രമോദിയുടെ പഴയകാല ചിത്രം  പങ്കുവെച്ച് കൊണ്ടുളള ബിജെപി ജനറല്‍ സെക്രട്ടറി രാം മാധവിന്റെ ട്വീറ്റ് ശ്രദ്ധേയമാകുന്നു.370-ാം അനുച്ഛേദത്തിനെതിരായി മോദി സമരം ചെയ്യുന്ന ചിത്രമാണ് പ്രതിജ്ഞ നിറവേറ്റിയെന്ന അടിക്കുറിപ്പോടെ രാം മാധവ് പങ്കുവെച്ചത്.

ചിത്രം നിമിഷങ്ങള്‍ക്കുളളില്‍ സോഷ്യല്‍മീഡിയ ഏറ്റെടുത്തു. മോദി പങ്കെടുത്ത സമരപന്തലില്‍ 370 റദ്ദാക്കൂ, തീവ്രവാദം അവസാനിപ്പിക്കൂ, രാജ്യത്തെ രക്ഷിക്കൂ എന്ന് എഴുതിയിരിക്കുന്നത് വ്യക്തമായി കാണാം.

370-ാം അനുച്ഛേദം റദ്ദാക്കിയതിനെ മഹത്തായ ദിനം എന്ന് വിശേഷിപ്പിച്ചും രാം മാധവ് ട്വീറ്റ് ചെയ്തിരുന്നു. ഏഴു പതിറ്റാണ്ടായുളള രാജ്യത്തിന്റെ ആവശ്യം നിറവേറ്റപ്പെട്ടിരിക്കുന്നുവെന്നും ഇതിന് സാക്ഷിയാകാന്‍ സാധിച്ചുവെന്നും അദ്ദേഹം കുറിച്ചു.

ജമ്മുകശ്മീരിന് പ്രത്യേക പദവി നല്‍കുന്ന ഭരണഘടനയുടെ 370-ാം അനുച്ഛേദം  റദ്ദാക്കി കൊണ്ടുളള രാഷ്ട്രപതിയുടെ വിജ്ഞാപനം പുറത്തുവന്നത് ഇന്നലെയാണ്. കൂടാതെ ഇതുമായി ബന്ധപ്പെട്ട്  ആഭ്യന്തരമന്ത്രി അമിത് ഷാ അവതരിപ്പിച്ച പ്രമേയം രാജ്യസഭ പാസാക്കുകയും ചെയ്തു. ഇതൊടൊപ്പം ജമ്മു കശ്മീര്‍ പുനഃസംഘടന ബില്ലും രാജ്യസഭ പാസാക്കി.