ആര്‍കെ നഗറില്‍ ദിനകരന് റെക്കോഡ് വിജയം ; മറികടന്നത് ജയലളിതയുടെ ഭൂരിപക്ഷം
ചെന്നൈ : ആര്‍കെ നഗര്‍ ഉപതെരഞ്ഞെടുപ്പില്‍ സ്വതന്ത്രസ്ഥാനാര്‍ത്ഥിയായി മല്‍സരിക്കുന്ന ടിടിവി ദിനകരന് വന്‍വിജയം കരസ്ഥമാക്കി. 40,707 വോട്ടുകളുടെ ഭൂരിപക്ഷത്തിനാണ് ദിനകരന്റെ വിജയം. എഐഎഡിഎംകെയുടെ ഇ മധുസൂദനനെയാണ് ദിനകരന് തോല്‍പ്പിച്ചത്. 2016 ലെ നിയമസഭാ തെരഞ്ഞെടുപ്പില്‍ ജയലളിതയ്ക്ക് ലഭിച്ച ഭൂരിപക്ഷവും ദിനകരന് മറികടന്നു. ജയലളിത 39545 വോട്ടിന്റെ ഭൂരിപക്ഷത്തിനാണ് വിജയിച്ചിരുന്നത്.
ആകെ പോള്‍ ചെയ്ത വോട്ടിന്റെ അമ്പതുശതമാനത്തിലേറെ ദിനകരന് ലഭിച്ചു. ടിടിവി ദിനകരന് 89,103 വോട്ട് ലഭിച്ചപ്പോള്‍, മധുസൂദനന് 48306 വോട്ടാണ് ലഭിച്ചത്. മൂന്നാം സ്ഥാനത്തെത്തിയ ഡിഎംകെയ്ക്ക് കെട്ടിവെച്ച കാശ് നഷ്ടമായി. ഡിഎംകെ സ്ഥാനാര്‍ത്ഥി മരുതു ഗണേഷിന് 24,581 വോട്ടാണ് ലഭിച്ചത്. 1368 വോട്ടുകള്‍ ബിജെപി നേടി.
ജയലളിതയുടെ യഥാര്‍ത്ഥ പിന്‍ഗാമി താനാണെന്ന് തെരഞ്ഞെടുപ്പ് ഫലം തെളിയിച്ചതായി ടിടിവി ദിനകരന് അഭിപ്രായപ്പെട്ടു. സര്‍ക്കാരിനെതിരായ ജനവിധിയാണിത്. തമിഴ്‌നാട്ടിലെ എടപ്പാടി പളനിസാമി സര്‍ക്കാര്‍ മൂന്നു മാസത്തിനകം താഴെ വീഴുമെന്നും ദിനകരന് പറഞ്ഞു. തനിക്ക് വന്‍പിന്തുണ നല്‍കിയതിന് ആര്‍കെ നഗറിലെ ജനങ്ങളോട് നന്ദി പറയുന്നുവെന്നും ദിനകരന് വ്യക്തമാക്കി.
നേരത്തെ ലീഡ് നില പുറത്തുവന്നതിന് പിന്നാലെ, പാര്‍ട്ടിയും ചിഹ്നവും അല്ല ജനങ്ങളാണ് പ്രധാനമെന്നാണ് ആര്‍കെ നഗര്‍ ഫലം സൂചിപ്പിക്കുന്നതെന്ന് ദിനകരന് അഭിപ്രായപ്പെട്ടിരുന്നു. പാര്‍ട്ടിയെക്കാള്‍, യഥാര്‍ത്ഥ സ്ഥാനാര്‍ത്ഥിയെയാണ് ജനം അംഗീകരിച്ചതെന്നും അദ്ദേഹം അഭിപ്രായപ്പെട്ടു. ദിനകരന്റെ വീടിന് മുന്നില്‍ അനുയായികള്‍ ആഹ്ലാദപ്രകടനം നടത്തുകയാണ്. 2016 ല്‍ 97218 വോട്ടുകള്‍ നേടിയ ജെ ജയലളിത, 39545 വോട്ടിന്റെ ഭൂരിപക്ഷത്തിനാണ് വിജയിച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
