കര്‍ണാടകയില്‍ ബിജെപി ഒറ്റയ്ക്ക് ഭൂരിപക്ഷം നേടുമെന്ന് കേന്ദ്രമന്ത്രി സദാനന്ദ ഗൗഡ

ബംഗലൂരു : കര്‍ണാടക നിയമസഭയില്‍ ബിജെപി ഒറ്റയ്ക്ക് ഭൂരിപക്ഷം നേടുമെന്ന് കേന്ദ്രമന്ത്രി സദാനന്ദ ഗൗഡ. ആരുമായും സഖ്യത്തെക്കുറിച്ച് ആലോചിക്കുന്നില്ലെന്നും സദാനന്ദ ഗൗഡ പറഞ്ഞു. കര്‍ണാടകയില്‍ ബിജെപി മുന്നേറ്റം തുടരുന്നതിനിടെയാണ് മുന്‍ മുഖ്യമന്ത്രി സദാനന്ദഗൗഡയുടെ പ്രതികരണം. 

തെരഞ്ഞെടുപ്പില്‍ എല്ലാ മേഖലയിലും ബിജെപി കുതിപ്പ് തുടരുകയാണ്. ബിജെപി ലീഡ് നൂറു കടന്നു. ബിജെപി നേതാക്കളായ യെദ്യൂരപ്പ, ഈശ്വരപ്പ, ജഗദീഷ് ഷെട്ടാര്‍, സോമശേഖര റെഡ്ഡി, കരുണാകര റെഡ്ഡി തുടങ്ങിയവരെല്ലാം മുന്നിട്ടു നില്‍ക്കുകയാണ്.

മുംബൈയോട് ചേര്‍ന്നുകിടക്കുന്ന പ്രദേശം, ഹൈദരാബാദിനോട് ചേര്‍ന്നുളള പ്രദേശം, തീരദേശം, സെന്‍ട്രല്‍ കര്‍ണാടക മേഖലകളില്‍ ബിജെപി ലീഡ് ചെയ്യുകയാണ്. മൈസൂരു മേഖല ജെഡിഎസും കയ്യടക്കിയതോടെ, ഭരണ കക്ഷിയായ കോൺ​ഗ്രസ് എല്ലാ മേഖലകളിലും അടിപതറി. 222 അം​ഗ നിയമസഭയിലേക്കാണ് മെയ് 12 ന് വോട്ടെടുപ്പ് നടന്നത്.