കൂട്ടുകാരിയുമൊത്തുള്ള വിമാനയാത്ര ഒഴിവാക്കാന്‍ വിമാനം റാഞ്ചുമെന്ന് ഭീഷണി സന്ദേശം; യുവാവ് അറസ്റ്റില്‍

ഹൈദരാബാദ്: മുംബൈ വിമാനത്താവളത്തില്‍ ബോംബ് വെച്ചിട്ടുണ്ടെന്നും വിമാനം റാഞ്ചുമെന്നും മുംബൈ പൊലീസ് മേധാവിക്ക് ഭീഷണി സന്ദേശമയച്ച വ്യക്തിയെ പിടികൂടി. ഹൈദരാബാദിലെ ഒരു ട്രാവല്‍ ഏജന്റായ വംസി കൃഷ്ണ എന്ന യുവാവിനെയാണ് ഹൈദരാബാദ് പൊലീസ് പിടികൂടിയിരിക്കുന്നത്. 

ഭീഷണി സന്ദേശം ലഭിച്ചതിനെ തുടര്‍ന്ന് മുംബൈയെ കൂടാതെ, ചെന്നൈ, ഹൈദരാബാദ് വിമാനത്താവളങ്ങളുടെ സുരക്ഷയും ശക്തമാക്കിയിരുന്നു. കൂട്ടുകാരിയുമായുള്ള യാത്ര ഒഴിവാക്കുന്നതിനായിരുന്നു ഇയാള്‍ ഭീഷണി സന്ദേശം അയച്ചത്. ചെന്നൈ സ്വദേശിയായ കൂട്ടുകാരിയെ മുംബൈയിലേക്ക് വിമാനത്തില്‍ യാത്ര കൊണ്ടുപോകാമെന്ന് വംസി വാക്ക് നല്‍കിയിരുന്നു. എന്നാല്‍ യാത്ര പോകേണ്ട സമയമായപ്പോഴേക്കും ഇയാളുടെ പക്കല്‍ പണമില്ലാതായി. 

ഭീഷണി സന്ദേശത്തെ തുടര്‍ന്ന് ചെന്നൈ,മുംബൈ,ഹൈദരാബാദ് എന്നിവിടങ്ങളിലേക്കുള്ള വിമാന സര്‍വീസുകള്‍ റദ്ദാക്കുമെന്നായിരുന്നു വംസിയുടെ പ്രതീക്ഷ. ഐപി അഡ്രസ് പിന്തുടര്‍ന്നായിരുന്നു ഇയാളെ പൊലീസ് പിടികൂടിയത്. ഒരു കമ്പ്യൂട്ടര്‍ കഫേയില്‍ നിന്ന് പെണ്‍കുട്ടിയുടെ ഇമെയില്‍ വിലാസത്തിലായിരുന്നു ഇയാള്‍ ഭീഷണി സന്ദേശം അയച്ചത്.