ലക്‌നൗ: ചൈനീസ് ആപ്പുകള്‍ ഡീലിറ്റ് ചെയ്യുന്നവര്‍ക്ക് സൗജന്യ മാസ്‌ക് പ്രചാരണവുമായി ബിജെപി. ഉത്തര്‍പ്രദേശിലെ ബിജെപി എംഎല്‍എ അനുപമ ജയ്‌സ്വാളാണ് പ്രചാരണവുമായി രംഗത്തുവന്നത്.ബിജെപി മഹിളാ മോര്‍ച്ചയുടെ ആഭിമുഖ്യത്തിലാണ് പ്രചാരണം.
ദിവസങ്ങള്‍ക്ക് മുന്‍പാണ് 59 ചൈനീസ് ആപ്പുകള്‍ കേന്ദ്രസര്‍ക്കാര്‍ നിരോധിച്ചത്. നിയന്ത്രണരേഖയിലെ ചൈനീസ് പ്രകോപനത്തിന്റെ പശ്ചാത്തലത്തിലായിരുന്നു നിരോധനം. നിയന്ത്രണരേഖയിലെ ചൈനീസ് പ്രകോപനത്തിന് പിന്നാലെ രാജ്യത്ത് ചൈനീസ് വിരുദ്ധ തരംഗം നിലനില്‍ക്കുന്നുണ്ട്. ചൈനീസ് ഉത്പന്നങ്ങള്‍ ബഹിഷ്‌കരിക്കണമെന്ന് ആവശ്യപ്പെട്ട് രാജ്യമൊട്ടാകെ പ്രചാരണവും നടക്കുന്നുണ്ട്. അതിനിടെയാണ് ചൈനീസ് ആപ്പുകള്‍ കേന്ദ്രസര്‍ക്കാര്‍ നിരോധിച്ചത്.
ഇതിന്റെ ചുവടുപിടിച്ചാണ് ബിജെപി എംഎല്‍എയുടെ പ്രചാരണം. ചൈനീസ് ആപ്പുകള്‍ മൊബൈലില്‍ നിന്ന് നീക്കം ചെയ്യുന്നവര്‍ക്ക് മുഖാവരണം സൗജന്യമായി നല്‍കുമെന്നാണ് വാഗ്ദാനം. യോഗി സര്‍ക്കാരില്‍ മന്ത്രിയായിരുന്ന അനുപമ ജയ്‌സ്വാളിനെ കഴിഞ്ഞ വര്‍ഷം മന്ത്രി സ്ഥാനത്ത് നീക്കുകയായിരുന്നു. അഴിമതി ആരോപണങ്ങളെ തുടര്‍ന്നാണ് മന്ത്രി സ്ഥാനത്ത് നിന്ന് നീക്കിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
