ന്യൂഡല്ഹി: ഡല്ഹി നിയമസഭ തെരഞ്ഞെടുപ്പില് മികച്ച വിജയം നേടിയ ആംആദ്മി പാര്ട്ടിയെ അഭിനന്ദിച്ച് പ്രധാനമന്ത്രി നരേന്ദ്രമോദി. ഡല്ഹിയിലെ ജനങ്ങളുടെ ആഗ്രഹങ്ങള് പൂര്ത്തീകരിക്കാന് മുഖ്യമന്ത്രി അരവിന്ദ് കെജരിവാളിനും ആംആദ്മി പാര്ട്ടിക്കും എല്ലാവിധ ആശംസകളും നേരുന്നതായി മോദി ട്വിറ്ററില് കുറിച്ചു.
നേരത്തെ, മുഖ്യമന്ത്രി അരവിന്ദ് കെജരിവാളിനെ അഭിനന്ദിച്ച് ബിജെപി ദേശീയ അധ്യക്ഷന് ജെ പി നഡ്ഡയും രംഗത്തുവന്നിരുന്നു.ഡല്ഹിയില് ബിജെപി ഉത്തരവാദിത്തപ്പെട്ട പ്രതിപക്ഷമായി പ്രവര്ത്തിക്കും. ഡല്ഹി വികസനവുമായി ആംആദ്മി പാര്ട്ടി സര്ക്കാര് മുന്നോട്ടുപോകുമെന്ന് പ്രതീക്ഷിക്കുന്നതായും നഡ്ഡ ട്വിറ്ററില് കുറിച്ചു.
ഡല്ഹിയിലെ ജനവിധിയെ ബിജെപി മാനിക്കുന്നു. തെരഞ്ഞെടുപ്പ് പ്രചാരണത്തില് പാര്ട്ടിയുടെ എല്ലാ പ്രവര്ത്തകരും വിശ്രമമില്ലാതെയാണ് പ്രവര്ത്തിച്ചത്. അവര്ക്ക് നന്ദി പറയുന്നതായും നഡ്ഡ ട്വീറ്റ് ചെയ്തു.
70 അംഗ ഡല്ഹി നിയമസഭയിലേക്ക് നടന്ന തെരഞ്ഞെടുപ്പില് 63 സീറ്റുകള് നേടിയാണ് ആംആദ്മി പാര്ട്ടിയുടെ കുതിപ്പ്. 48 സീറ്റുകളില് വിജയിച്ച് സര്ക്കാര് രൂപീകരിക്കുമെന്ന് അവകാശവാദം ഉന്നയിച്ച ബിജെപിക്ക് ഏഴു സീറ്റുകള് മാത്രമാണ് ലഭിച്ചത്. ഒരു സീറ്റ് പോലും കിട്ടാതെ കോണ്ഗ്രസ് തെരഞ്ഞെടുപ്പില് സമ്പൂര്ണ പരാജയമാണ് ഏറ്റവാങ്ങിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
