തിളച്ച ഗുലാബ് ജാമുന്‍ ലായനിയില്‍ വീണ് പിഞ്ചുകുഞ്ഞിന് ദാരുണാന്ത്യം; ദുരൂഹത ആരോപിച്ച് ബന്ധുക്കള്‍ 

മുംബൈ:തിളച്ച ഗുലാബ് ജാമുന്‍ ലായനിയില്‍ വീണ് പിഞ്ചുകുഞ്ഞിന് ദാരുണാന്ത്യം. ദല്‍വാഡി ആഘോഷത്തിന്റെ ഭാഗമായി തയ്യാറാക്കി കൊണ്ടിരുന്ന ഗുലാബ് ജാമുന്‍ ലായിനിയില്‍ വീണ് രാജ്‌വീര്‍ നിതിന്‍ മേഘാവല്‍ എന്ന രണ്ടുവയസുകാരനാണ് മരിച്ചത്. 

ഔറംഗബാദിലാണ് സംഭവം. ദല്‍വാഡി ആഘോഷത്തിന്റെ ഭാഗമായി പാചകക്കാരന്‍ ഗുലാബ് ജാമുന്‍ പാകം ചെയ്യുകയായിരുന്നു. അതിനുവേണ്ടിയുള്ള ലായനി തിളപ്പിക്കുന്നതിന്റെ അടുത്താണ് കുട്ടി കളിച്ചുകൊണ്ടിരുന്നത്. പെട്ടെന്നാണ് കുഞ്ഞ് തിളച്ച ലായനിയിലേക്ക് വീണത്.

ഉടന്‍ തന്നെ ആശുപത്രിയില്‍ എത്തിച്ചെങ്കിലും ഗുരുതരമായി പൊള്ളലേറ്റതിനെതുടര്‍ന്ന് കുഞ്ഞ് മരിച്ചു. കുട്ടി കലത്തില്‍ വീണതില്‍ ദുരൂഹതയുണ്ടെന്ന് ബന്ധുക്കള്‍ ആരോപിച്ചു. അന്വേഷണം വേണമെന്ന് ഇവര്‍ ആവശ്യപ്പെട്ടിട്ടുണ്ട്.